Drejtuesit e një xhamie në Bradford kanë shprehur habinë e tyre pasi një video e orëve të pilates për burra ka arritur mbi dy milionë shikime në rrjetet sociale.
Xhamia Jamia Usmania në rrugën Heaton organizon çdo të enjte orë të pilates për burra mbi moshën 50 vjeç, me synim përmirësimin e shëndetit dhe mirëqenies së tyre. Sipas sekretarit të xhamisë, Mohammed Ilyas, iniciativa ka rezultuar shumë e suksesshme dhe numri i pjesëmarrësve është rritur aq shumë sa është dashur të kufizohet për shkak të mungesës së hapësirës.
“Jemi të shokuar, për të qenë të sinqertë. Videoja ka shkuar në mbarë botën, me afro dy milionë shikime në TikTok dhe shumë të tjera në Facebook,” tha ai.
Ilyas shtoi se kanë marrë komente dhe kërkesa nga vende të ndryshme të botës, ku njerëzit pyesin se si mund të organizojnë klasa të ngjashme në xhamitë e tyre. Ai tha gjithashtu se ka marrë shumë telefonata nga xhami të ndryshme në Angli që duan të zhvillojnë këto seanca.
Orët drejtohen nga instruktori Zara Kayani, i cili theksoi se aktiviteti ndihmon në përmirësimin e fleksibilitetit, si dhe ka përfitime mendore dhe shpirtërore. Ai shtoi se klasat janë edhe një mundësi për burrat që të socializohen dhe të kalojnë kohë së bashku.
Pjesëmarrësit shprehen se aktiviteti i ka ndihmuar shumë. Abid Khan, 62 vjeç, i cili ka filluar të marrë pjesë pas një transplanti zemre, tha se pilates e ka ndihmuar si fizikisht ashtu edhe emocionalisht. Ndërsa Habib Rehman, 60 vjeç, tha se orët e kanë ndihmuar me dhimbjet e shpinës dhe i kanë dhënë mundësi të socializohet.
Drejtuesit e xhamisë thanë se synimi është që xhamia të shërbejë si qendër komunitare dhe jo vetëm si vend për falje. Ata shtuan se po ndërtohet një ndërtesë e re pranë xhamisë, e cila në të ardhmen do të mundësojë edhe organizimin e klasave për gratë. /mesazhi
