Agjentët e Imigracionit dhe Doganave të SHBA-së (ICE) ndaluan një djalë 5-vjeçar nga shtëpia e tij në shtetin e Minesotës, sipas raportimeve të medias të enjten, transmeton Anadolu.
Fëmija u mor nga agjentët e ICE-s nga oborri i shtëpisë së tij në periferi të Minneapolis të martën, pasi u kthye nga kopshti dhe u transportua me të atin në një qendër imigracioni në Teksas.
Zyrtarët e shkollës thanë në një konferencë për media se Liam Conejo Ramos u nxor nga makina e familjes përpara shtëpisë së tij dhe u mor nga agjentët.
“Një i rritur tjetër që jetonte në shtëpi ishte jashtë dhe iu lut agjentëve që t’i linin të kujdeseshin për fëmijën e vogël, por iu refuzua”, tha Zena Stenvik, mbikëqyrëse e Lagjes Shkollore “Columbia Heights”.
Ajo shtoi se “agjentët e ICE-s e çuan atë te dera dhe e udhëzuan të trokiste në derë, duke kërkuar të futej brenda, për të parë nëse dikush tjetër ishte në shtëpi, duke përdorur në thelb një 5-vjeçar si karrem”.
“Pse të ndalohet një 5-vjeçar?. Nuk mund të më thoni se ky fëmijë do të klasifikohet si një kriminel i dhunshëm”, tha Stenvik.
Departamenti i Sigurisë Kombëtare (DHS) lëshoi një deklaratë për të sqaruar kontekstin e ndalimit të 5-vjeçarit. “ICE nuk shënjestroi një fëmijë”, postuan zyrtarët e DHS në kompaninë amerikane të mediave sociale X. “Fëmija ishte i braktisur”, thanë ata.
Sipas zyrtarëve të DHS-së dhe ICE-s, babai i djalit, Adrian Alexander Conejo Arias, ishte shënjestra e një sulmi ndaj emigracionit për shkak të statusit të tij të emigracionit të paligjshëm në SHBA nga Ekuadori.
Zëdhënësja e Sigurisë Kombëtare, Tricia McLaughlin tha se DHS dhe ICE po kryenin operacion për të arrestuar babanë e fëmijës kur ai “iku në këmbë, duke e braktisur fëmijën e tij”.
“Për sigurinë e fëmijës, një nga oficerët tanë të ICE-s qëndroi me fëmijën ndërsa oficerët e tjerë arrestuan babanë”, tha McLaughlin.
Zëvendëspresidenti i SHBA-së, JD Vance, sqaroi ndalimin e 5-vjeçarit gjatë një konference për media gjatë vizitës në Minneapolis.
“Babai iku. Pra, historia është se ICE ndaloi një 5-vjeçar. Epo, çfarë duhet të bëjnë? A duhet ta lënë një fëmijë 5-vjeçar të ngrijë për vdekje?”, tha Vance. “A nuk duhet ta arrestojnë një të huaj të paligjshëm në SHBA?”.
Ndalimi i vogëlushit po dënohet nga demokratët e Minesotës.
Ndalimi i Ramosit nuk ishte i vetmi rast i agjentëve të ICE-s që ndaluan nxënës në zonën e Minneapolisit. Zyrtarët e shkollës thanë se tre nxënës të tjerë u morën nga agjentët federalë të martën, përfshirë një nxënës 17-vjeçar të shkollës së mesme “Columbia Heights” i cili ishte në rrugë për në shkollë.
