Si i ndryshon ekuilibrat ofensiva e re
Ofensiva e re e qeverisë së njohur ndërkombëtarisht të Jemenit kundër huthinjve, po hyn në një fazë që mund të ndryshojë ekuilibrin e luftës, edhe pse është ende shumë herët për të folur për një fitore vendimtare.
Pas viteve në të cilat frontet kishin mbetur kryesisht të ngrira, forcat e mbështetura nga Arabia Saudite kanë kaluar në sulm dhe kanë rimarrë pozicione strategjike pranë ngushticës Bab al-Mandeb.
Por huthinjtë kanë treguar tashmë se janë në gjendje të reagojnë shpejt dhe ta zhvendosin presionin drejt Taizit, Adenit dhe territorit saudit.
Operacioni i pagëzuar “Agimi i Jemenit” synon fillimisht të zmbrapsë përparimin e huthinjve përgjatë bregut të Detit të Kuq, pasi grupi i mbështetur nga Irani kishte fituar terren të rëndësishëm gjatë shtatorit, përfshirë zona pranë një prej korridoreve më të rëndësishme detare në botë.
Sipas Al Jazeera-s, forcat qeveritare kanë rimarrë Dhubabin dhe pozicione të tjera pranë Bab al-Mandebit, ndërsa Brigadat e Gjigantëve kanë një rol qendror në këtë ofensivë të re.
Ajo që ka ndryshuar këtë herë është sidomos mbështetja ajrore dhe koordinimi. Arabia Saudite ka rikthyer në mënyrë të hapur goditjet ajrore, me rreth 100 avionë të përfshirë në ofensivë, ndërsa inteligjenca amerikane po ndihmon në identifikimin e objektivave.
Kjo është shumë më tepër sesa mbështetja që kishin forcat qeveritare jemenase gjatë fazave të fundit të konfliktit. Reuters raporton gjithashtu se Turqia po ofron mbështetje teknike dhe mbrojtëse, ndërsa Pakistani është përfshirë në ndihmën ushtarake dhe të zbulimit.
Pikërisht këtu qëndron një nga ndryshimet më të rëndësishme. Forcat që luftojnë kundër huthinjve kanë qenë shpesh të përçara, me interesa dhe struktura të ndryshme komanduese.
Këtë herë, sipas analistëve të cituar nga Al Jazeera, kombinimi i menaxhimit operacional saudit, Brigadave të Gjigantëve dhe mbështetjes amerikane në inteligjencë ka krijuar një koordinim më të mirë mes forcave tokësore dhe ajrore. Dhe kjo mund t’u japë qeveritarëve një avantazh që nuk e kishin në ofensivat e mëparshme.
Por ekziston një problem i madh: huthinjtë nuk janë një forcë që shembet vetëm sepse humbet disa qytete apo pozicione. Ata kanë avantazh në terrenin malor, një rrjet të konsoliduar logjistik dhe një arsenal të rëndësishëm raketash e dronësh.
Të mërkurën, ata sulmuan aeroportin e Adenit dhe pretenduan sulme ndaj objektivave në Arabinë Saudite. Reuters raportoi se sulmet në aeroportet saudite shkaktuan viktima, duke treguar se grupi ende ruan aftësinë për të goditur larg vijës së frontit.
Madje, përparimi i forcave qeveritare nuk është pa kundërgoditje. Instituti për Studimin e Luftës vlerëson se forcat huthi kanë penguar përparimin e mëtejshëm në disa zona dhe vazhdojnë të ushtrojnë presion mbi Taizin.
Nëse Taizi bie ose rrethohet, narrativa e ofensivës qeveritare mund të përmbyset shumë shpejt. Mëngjesin e sotëm, ushtria qeveritare pretendoi se kishte “neutralizuar” 1.860 luftëtarë huthinj dhe kishte kryer 2.103 operacione të sakta goditjeje që nga fillimi i ofensivës.
Nëse huthinjtë mposhten, pasojat do të shtriheshin shumë përtej Jemenit. Kontrolli i Bab El-Mandebit do të dobësonte ndjeshëm aftësinë e tyre për të kërcënuar transportin detar në Detin e Kuq dhe do të reduktonte një nga instrumentet kryesore të presionit të Iranit në Gadishullin Arabik.
Arabia Saudite do të fitonte siguri për kufirin jugor dhe infrastrukturën e saj energjetike, ndërsa tregjet globale do të merrnin një sinjal pozitiv për stabilizimin e një prej korridoreve më të rëndësishme të tregtisë.
Por një fitore e shpejtë është ende larg. Lufta për Sanaan, Hodeidën dhe zonat malore do të ishte shumë më e vështirë sesa rimarrja e disa pozicioneve bregdetare. Për këtë arsye, skenari më realist nuk është një kapitullim i menjëhershëm i huthinjve, por një luftë e gjatë konsumimi, në të cilën suksesi do të varet nga aftësia e qeverisë, Arabisë Saudite dhe aleatëve të tyre për të ruajtur unitetin, mbështetjen ndërkombëtare dhe epërsinë ajrore.
Nga ana tjetër, nëse do dështojë kjo ofensivë, huthinjtë do të dalin më të fuqishëm dhe më të rrezikshëm se më parë. \tesheshi
