Hamdullah Fitrat, një zëdhënës i qeverisë afgane, ka bërë të ditur se më shumë se 50 civilë janë vrarë në përleshjet me Pakistanin, transmeton Anadolu.
Fitrat tha se që nga e enjtja “52 civilë, shumica gra dhe fëmijë, janë vrarë, 66 janë plagosur dhe tetë shtëpi janë shkatërruar plotësisht”.
Ai në rrjetet sociale njoftoi se viktimat u raportuan në provincat Paktika, Khost, Kunar, Nangarhar dhe Kandahar.
Deri më tani nuk ka pasur ndonjë reagim të menjëhershëm nga Islamabadi ndaj akuzave.
Tensionet mes dy vendeve fqinje janë rritur që nga e enjtja vonë, kur Kabuli nisi “operacione hakmarrëse” përgjatë kufirit pas sulmeve ajrore pakistaneze të dielën e kaluar.
Pakistani u përgjigj me zjarr të rëndë dhe sulme ajrore ndaj disa provincave në Afganistan.
Sipas shifrave nga Kabuli, numri i të vdekurve në të dyja anët e kufirit është rritur në 78.
Sipas këtyre të dhënave, 12 ushtarë pakistanezë dhe një civil janë vrarë, ndërsa Kabuli tha se 13 ushtarë të tij u vranë dhe 52 civilë humbën jetën gjatë përleshjeve.
Një ushtar pakistanez mbetet i zhdukur.
Dje, ministri i Informacionit i Pakistanit, Attaullah Tarar, pretendoi se 352 operativë të talebanëve afganë dhe militantë të dyshuar janë vrarë dhe 535 janë plagosur në sulmet ajrore dhe përleshjet që nga e enjtja.
Nga ana e tij, Kabuli deklaroi se 56 ushtarë pakistanezë janë vrarë në përleshjet kufitare.
Shifrat e dhëna nga Islamabadi dhe Kabuli nuk mund të verifikoheshin në mënyrë të pavarur.
Pakistani ka këmbëngulur se “vetëmbrojtja” e tij ka “siguruar” që asnjë civil të mos jetë shënjestruar.
Pakistani të dielën e kaluar kreu sulme ajrore ndaj “objektivave terroriste”, duke vrarë 70 “terroristë”, ndërsa zyrtarët afganë dhe OKB-ja raportuan vdekje civilësh, pretendime që Pakistani i mohon.
Marrëdhëniet janë përkeqësuar muajt e fundit pasi Pakistani akuzon militantët se veprojnë nga territori afgan, një pretendim që Kabuli e hedh poshtë, megjithëse kontaktet diplomatike rajonale vazhdojnë mes përpjekjeve për uljen e tensioneve.
