Kompania amerikane e teknologjisë Apple është afër përfundimit të një marrëveshjeje me grupin e prodhuesit të automjeteve të Koresë së Jugut, Hyundai-Kia për projektin e automjeteve elektrike autonome, transmeton Anadolu Agency (AA).
Prodhuesi i iPhone vitet e fundit ka planifikuar të prodhojë “Apple Car” në Amerikën e Veriut me një prodhues të fortë automjetesh, por kërkon të kontrollojë projektin nga softueri deri tek kërkesat e pajisjeve, duke këmbëngulur se do të bazohet në teknologjinë Apple.
Automjeti elektrik autonom mund të shohë prodhimin në vitin 2024 në fabrikën e Kia në West Point të Georgias, sipas CNBC.
Ende nuk është arritur asnjë marrëveshje përfundimtare midis dy kompanive ndërsa Apple mund të zgjedhë gjithashtu një prodhues tjetër automjetesh për projektin, thuhet më tej.
Grupi Hyundai-Kia është prodhuesi i tretë më i madh i automjeteve në botë për nga vëllimi i prodhimit, që radhiten pas kompanisë japoneze Toyota dhe Volkswagen Group të Gjermanisë.
Për Hyundai-Kia, projekti i përbashkët me Apple do të forconte njohuritë e tyre për prodhimin e një automjeti autonom në të ardhmen.
Sa i përket Apple, projekti do ta shtynte kompaninë e teknologjisë në tregun global të industrisë së automjeteve që vlen rreth 10 trilionë dollarë.
Apple aktualisht ka afërsisht një të tretën e aksioneve prej 500 miliardë dollarësh në tregun global të telefonave të mençur.
Numri i automjeteve elektrike parashikohet të rritet nga 8 milionë në vitin 2019, në mbi 1.1 miliardë deri në vitin 2050, thuhet në raportin e Agjencisë Ndërkombëtare të Energjisë së Rinovueshme (IRENA) në maj 2020.
