Policia e Winnipegut ka arrestuar dhe akuzuar një burrë 34-vjeçar pasi disa objekte fetare dhe publike, përfshirë një sinagogë, një xhami dhe një shkollë të mesme, u vandalizuan me grafite që përfshinin svastika dhe mesazhe urrejtjeje.
Sipas Shërbimit Policor të Winnipegut (WPS), Oliver Didtger Ederhof është akuzuar me 14 raste dëmtimi nën vlerën 5 mijë dollarë, lidhur me grafite me motive urrejtjeje të spërkatura në garazhe, shtëpi, automjete, tabela parqesh, një shkollë dhe objekte kulti. Hetimet janë ende në vazhdim dhe autoritetet nuk përjashtojnë mundësinë e shtimit të akuzave për krime urrejtjeje.
Të premten e kaluar, i dyshuari dyshohet se ka vandalizuar fasadën prej mermeri dhe dyert prej xhami të sinagogës Congregation Shaarey Zedek me svastika dhe fjalën “hate”, njoftoi Federata Hebraike e Winnipegut. Të dielën, policia reagoi ndaj një objekti të dyshimtë në vendngjarje, por më pas konfirmoi se nuk përbënte rrezik për sigurinë publike.
Federata hebraike bëri të ditur se të hënën ishte informuar edhe për svastika të spërkatura në shkollën e mesme Kelvin High School, duke shprehur shqetësim për “një model shqetësues veprimesh të motivuara nga urrejtja” në qytet.
Sipas transmetuesit publik CBC, të mërkurën u vandalizuan gjithashtu xhamia dhe qendra komunitare Abu Bakr Al-Siddique, po ashtu me svastika. Kryeministri i Manitobës, Wab Kinew, i dënoi ashpër aktet, duke i cilësuar si antisemitike dhe islamofobike, dhe deklaroi se “urrejtja dhe frikësimi nuk do të pranohen”.
Kinew premtoi se qeveria e tij do të ndërmarrë masa konkrete për të luftuar krimet e urrejtjes, përfshirë forcimin e reagimit policor dhe emërimin e një prokurori të posaçëm për këto raste.
Edhe kryebashkiaku i Winnipegut, Scott Gillingham, përgëzoi policinë për arrestimin, duke theksuar se “kjo lloj urrejtjeje nuk është e mirëpritur në lagjet tona dhe autorët do të përballen me pasojat ligjore”. /mesazhi
