Ambasadori palestinez në OKB, Riyad Mansour, ka folur në një seancë të Këshillit të Sigurimit për situatën në Lindjen e Mesme, duke akuzuar Izraelin se po përdor ndihmën humanitare si një armë lufte kundër popullit palestinez.
Mansour tha se në Gaza ka “egërsi në bombardime, egërsi në shkatërrim, egërsi në bllokadë dhe madje edhe egërsi në shpërndarjen e ndihmave shumë të kufizuara.”
Ai kritikoi sistemin aktual të ndihmës, duke thënë: “Kush tha që këto duhet të jenë zgjedhjet tona? Një bllokadë e plotë kundër një popullsie civile, përfshirë 1 milion fëmijë, ose një sistem ndihme që është poshtërues, diskriminues dhe i kufizuar vetëm në ushqim e në sasi të vogël.”
Sipas tij, qëllimi i këtij sistemi është zhvendosja e detyruar e popullsisë dhe marrja e paligjshme e tokës. “Zyrtarët izraelitë po e thonë hapur këtë. E pamë urinë si armë lufte, tani po e shohim ndihmën si armë lufte.”
Ai e përfundoi me një thirrje për veprim: “A duhet të heshtim sepse alternativa është më e keqe, apo të ngrihemi për njerëzillëkun e palestinezëve dhe çdo civili në kohë lufte?” /mesazhi
