Japonia ndaloi sot operacionet në një reaktor në termocentralin më të madh bërthamor në botë për shkak të një problemi që përfshinte shufrat e kontrollit, vetëm një ditë pasi njësia u rinis, transmeton Anadolu.
Kompania e Energjisë Elektrike të Tokios (TEPCO) tha se ndaloi reaktorin nr. 6 në termocentralin bërthamor “Kashiwazaki-Kariwa” në prefekturën Niigata pasi u zbulua një mosfunksionim në komponentët elektrikë që operojnë shufrat e kontrollit.
Reaktori ishte rikthyer në punë të mërkurën pas përfundimit të inspektimeve, raportoi “Kyodo News”. Përpjekjet për të zgjidhur mosfunksionimin ishin të pasuksesshme, duke çuar në mbyllje. Shkaku është nën hetim.
Rinisja është vonuar tashmë me një ditë pasi një alarm i shufrës së kontrollit u prish gjatë një prove të martën. TEPCO tha se reaktori u rinis pasi inspektimet konfirmuan se shufrat e kontrollit po funksiononin siç duhet.
Termocentrali “Kashiwazaki-Kariwa”, i cili ka një kapacitet total prej 8.2 gigavatësh dhe strehon shtatë reaktorë, ka mbetur i papunë që nga viti 2012. Operacionet u pezulluan pas shqetësimeve për sigurinë publike të ngritura nga katastrofa bërthamore e Fukushima Daiichi e shkaktuar nga cunami dhe pikëpyetjeve mbi aftësinë e TEPCO-s për të menaxhuar në mënyrë të sigurt impiantet bërthamore.
Autoriteti Rregullator Bërthamor i Japonisë tha se reaktori mbetet në një gjendje të qëndrueshme dhe se nuk ka shqetësime aktuale për sigurinë.
