Dhjetëra protestues janë vrarë dhe 12 policë kanë humbur jetën po ashtu gjatë protestave të dhunshme në Kazakistan. Autoritetet në Kazakistan ka thënë se janë pushtuar ndërtesat qeveritare e u është vënë zjarri.
Një polic është gjetur me kokë të prerë, kanë njoftuar autoritetet kazake, raporton agjencia AP.
Pasi kanë hyrë në rezidencën presidenciale e po ashtu në zyrën e kryebashkiakut në qytetin e dytë më të madh në Kazakistan, Almaty, demonstruesit kanë vazhduar të marshojnë nëpër më tepër ndërtesa gjatë natës.
“Dhjetëra sulmues janë likuiduar”, ka thënë zëdhënësja e Policisë, Saltanat Azirbek, për kanalin televiziv “Khabar-24”.
Ajo ka përdorur termin që zakonisht përdoret për vrasjen e njerëzve që mendohet se janë ekstremistë.
12 policë janë vrarë në trazira dhe raportohet për 353 të lënduar.
Derisa presidenti i Kazakistanit fillimisht ishte munduar të qetësojë protestuesit, ai më vonë ka premtuar masa të ashpëra për të shtypur protestat, të cilat thotë se janë shkaktuar nga “banda terroriste” dhe i ka bërë thirrje Rusisë për ndihmë ushtarake. Aeroportet në Almaty dhe dy qytete tjera janë mbyllur dhe shërbimi i internetit përkohësisht është ndërprerë për ditën e dytë me radhë, duke bllokuar qasjen në faqet e lajmeve në Kazakistan.
Dhjetëra mijëra persona, disa duke mbajtur shkopinj e mburoja, kanë dalë në rrugë në ditët e fundit, pas rritjes së çmimeve të derivateve, në protestat më të rënda në Kazakistan që kur e ka fituar pavarësinë nga Bashkimi Sovjetik tri dekada më parë.
Ndonëse protestat nisën pas dyfishimit të çmimit të derivateve, madhësia dhe rritja e shpejt e tyre reflektojnë për pakënaqësinë e madhe në një shtet që është qeverisur nga e njëjta parti që nga pavarësia.
Një aleancë ushtarake e drejtuar nga Rusia, CSTO, ka thënë të enjten se do të dërgojë trupa paqeruajtëse në Kazakistan me kërkesë të presidentit Kassym-Jomart Tokayev.
Operacioni është aksioni i parë ushtarak nga CSTO, një indikacion që fqinjtë e Kazakistanit, veçanërisht Rusia, janë të shqetësuara se trazirat mund të shpërndahen edhe nëpër shtete tjera.
Rusia dhe Kazakitani kanë një lidhje të ngushtë e po ashtu edhe një vijë kufitare 7600 kilometra.
Në pamje që kanë qarkulluar në rrjete sociale janë parë forcat e sigurisë në Kazakistan duke shtënë me armë në drejtim të protestuesve, ndërsa po ashtu kanë qarkulluar pamje të trupave ushtarake ruse duke hyrë në Kazakistan. /koha
