Kryeministri bullgar Kiril Petkov ka bërë të ditur se data e vizitës së tij të parë në Maqedoninë e Veriut ndoshta do të jetë 18 janari.
Në një intervistë për televizionin “Bloomberg”, siç raporton korrespondenti i MIA-s nga Sofja, Petkov tha se duan të krijojnë një kornizë krejtësisht të ndryshme për bisedimet me Kovaçevskin.
Ai thekson se deri më tani fokusi kryesor ka qenë te debati historik, por mendon se është më e rëndësishme që të gjitha diskutimet të vendosen mbi baza fituese për të gjithë. Prandaj, siç thotë ai, po hapim pesë grupe të reja – për infrastrukturë, ekonomi, shkëmbime kulturore, anëtarësim në BE dhe histori.
Petkov gjithashtu tha se nuk e kupton pse duhet të fluturojë përmes Vjenës për të shkuar në Shkup, duke theksuar se duhet të ketë fluturime Sofje-Shkup. Ai shtoi se nuk e kupton pse nuk ka lidhje hekurudhore ndërmjet Sofjes dhe Shkupit. /shenja
