Vendet perëndimore kanë shkaktuar një krizë globale ushqimore duke vendosur sanksionet më të rënda në historinë moderne kundër Rusisë, ka deklaruar Kremlini, shkruan skynews.
“Rusia ka qenë gjithmonë një eksportues i besueshëm i grurit,” tha zëdhënësi i Kremlinit Dmitry Peskov. “Ne nuk jemi burimi i problemit. Burimi i problemit që po shkakton urinë globale janë ata që vendosën sanksione kundër nesh dhe vetë sanksionet.”
Rusia dhe Ukraina së bashku përbëjnë gati një të tretën e furnizimeve globale të grurit.
Ukraina është gjithashtu një eksportues i madh i misrit, elbit, vajit të lulediellit dhe vajit të rapit, ndërsa Rusia dhe Bjellorusia, e cila ka mbështetur Moskën në luftë dhe është sanksionuar gjithashtu përbëjnë mbi 40% të eksporteve globale të lëndës ushqyese.
Organizata e Kombeve të Bashkuara kanë thënë se 36 vende mbështeten tek Rusia dhe Ukraina për më shumë se gjysmën e importeve të grurit, duke përfshirë disa nga më të varfrat, mes tyre Libanin, Sirinë, Jemenin, Somalinë dhe Republikën Demokratike të Kongos.
Javën e kaluar, Sekretari i Përgjithshëm i OKB-së Antonio Guterres tha se ai ishte në kontakt të vazhdueshëm me Rusinë, Ukrainën, Turqinë, Shtetet e Bashkuara dhe Bashkimin Europian në një përpjekje për të rivendosur eksportet e drithërave nga Ukraina, ndërsa kriza globale e ushqimit po përkeqësohet.
Presidenti rus Vladimir Putin, tha Kremlini, gjithashtu ra dakord me vlerësimin e Kombeve të Bashkuara se bota u përball me një krizë ushqimore që mund të shkaktojë uri në botë. /abcnews
