Kremlini: Rusia “nuk mund të detyrohet me forcë për paqe” siç dëshiron Zelenskyy

Dmitry Peskov

Rusia nuk mund të “detyrohet me forcë drejt paqes” ashtu siç dëshiron presidenti ukrainas Volodymyr Zelenskyy, tha sot zëdhënësi i Kremlinit, Dmitry Peskov, raporton Anadolu.

Mosgatishmëria e Zelenskyyt për të bërë marrëveshje është një “gabim fatal”, tha Peskov në lidhje me fjalimin e presidentit ukrainas në Këshillin e Sigurimit të OKB-së të hënën, ku ai tha se lufta Rusi-Ukrainë nuk mund të ndalet me bisedime dhe “ajo që nevojitet është të detyrohet Rusia me forcë drejt paqes”.

“Rusia është mbështetëse e paqes. Por me kusht që të garantojë bazat e sigurisë së saj dhe të përmbushë detyrat me të cilat përballet operacioni special ushtarak”, tha ai.

“Nga këndvështrimi im, një pozicion i tillë (mosgatishmëria për të bërë marrëveshje) është një gabim fatal, gabim sistemik. Ky është keqkuptim i thellë, i cili do të ketë pasoja për regjimin e Kievit”, shtoi ai.

Peskov hodhi poshtë kategorikisht akuzat e Zelenskyyt për shkeljen e supozuar të Rusisë të Kartës së OKB-së, duke theksuar se ajo vepron në “përputhje të rreptë me të drejtën ndërkombëtare”.

“Rusia kundërshton kategorikisht përdorimin e standardeve të dyfishta në interpretimin e ligjit ndërkombëtar, për të cilin Britania dhe SHBA-ja janë të famshme”, tha ai.