Kryeministri izraelit, Benjamin Netanyahu mori pjesë në një seancë gjyqësore në Gjykatën e Qarkut të Tel Avivit të martën për t’iu përgjigjur akuzave në çështjen e tij të korrupsionit, transmeton Anadolu.
Gjyqi i së martës shënoi seancën e 65-të në çështjet e korrupsionit të Netanyahut, gjatë së cilës kryeministri iu përgjigj akuzave të ngritura kundër tij në Rastin 4000, në të cilin ai akuzohet për ryshfet me Shaul Elovitch, një zyrtar të lartë në kompaninë e telekomunikacionit Bezeq, raportoi gazeta “Maariv”.
E përditshmja tha se Netanyahu dhe familja e tij paraqitën “kërkesa të ndryshme për çiftin Elovitch në lidhje me mënyrën e mbulimit në faqen e internetit të lajmeve Walla”.
Netanyahu kërkoi një pushim 30-minutësh në fillim të seancës për të marrë pjesë në një stërvitje përmes Zoom “në përgatitje për një sulm të mundshëm me raketa”, shtoi Maariv.
Media izraelite thonë se Netanyahu shfrytëzon takimet politike dhe të sigurisë, udhëtimet dhe telefonatat si një mjet për të shmangur sallën e gjyqit.
Në fillim të dhjetorit, Netanyahu i paraqiti një kërkesë zyrtare presidentit Isaac Herzog për t’u falur për akuzat ndaj tij për korrupsion.
Kërkesa shkaktoi përçarje në Izrael, pasi shumë veta kundërshtuan dhënien e një faljeje nëse Netanyahu nuk pranon fajin dhe nuk tërhiqet nga jeta politike.
Kryeministri izraelit ka refuzuar vazhdimisht të pranojë fajin dhe kohët e fundit ka deklaruar se nuk do të largohet nga politika në rast faljeje për akuzat.
Në janar, Netanyahu filloi seancat e marrjes në pyetje në lidhje me akuzat për korrupsion në rastet e përcaktuara 1000, 2000 dhe 4000, të cilat ai i mohon të gjitha.
Kryeministri izraelit përballet gjithashtu me akuza për krime lufte dhe krime kundër njerëzimit, me Gjykatën Ndërkombëtare Penale që lëshoi urdhër-arreste për të dhe ish-ministrin e Mbrojtjes, Yoav Gallant në nëntor 2024 për mizoritë në Gaza, ku gati 71.000 njerëz, kryesisht gra dhe fëmijë, janë vrarë që nga tetori 2023.
