Kryeministri grek Kyriakos Mitsotakis u takua të hënën me homologun e tij izraelit, Benjamin Netanyahu, në Jerusalem. Udhëtimi ka ndodhur pa asnjë njoftim paraprak nga Mansioni Maximos.
Kryeministri shoqërohej nga ministri i Jashtëm George Gerapetritis, gjë që çoi në anulimin e pjesëmarrjes së tij në Këshillin e Punëve të Jashtme të së hënës në Luksemburg.
Sipas raportimeve, Mitsotakis përcolli ‘dënimin dhe pikëllimin e tij të fortë për sulmet terroriste të kryera nga Hamasi’. Përveç kësaj, ai nënvizoi të drejtën e Izraelit për vetëmbrojtje, në përputhje me ligjin ndërkombëtar.
Nga ana e tij, Netanyahu thuhet se përcolli vlerësimin e tij për solidaritetin e treguar nga Greqia dhe populli grek.
Fillimisht, Mitsotakis ishte planifikuar të vizitonte Izraelin të enjten, por udhëtimi u shty për shkak të shqetësimeve të sigurisë.
Gjatë Samitit të Paqes në Kajro të mbajtur të shtunën, i cili synonte të gjente mënyra për të “de-përshkallëzuar” konfliktin Izrael-Hamas, Mitsotakis deklaroi se asnjë ndërhyrje ushtarake nuk mund të zëvendësojë një zgjidhje të qëndrueshme politike. /mesazhi
