Napoli do të mundohet ta harrojë dëshpërimin në Ligën e Kampionëve.
Napolitanët me Amir Rrahmanin në qendër të mbrojtjes u eliminuan nga Milani në çerekfinale të Ligës së Kampionëve, por janë afër që të triumfojnë në Serie A.
Napoli, të dielën në orën 20:45, do të luajë në udhëtim te Juventusi. Kjo ndeshje i takon xhiros së 31-të.
Napolitanët janë liderë të ligës me 75 pikë.
Juventusi është kthyer në pjesën e epërme të tabelës pas vendimit për rikthimin e 15-të pikëve. Juventusi në vendin e tretë ka 59 pikë.
Deri në fund të sezonit kanë mbetur edhe tetë xhiro për t’u luajtur në Serie A, ndërsa Napoli për herë të fundit titullit i ishte gëzuar në vitin 1990 me Diego Armando Maradonën në skuadër.
Napolit i duhen edhe 11 pikë për ta siguruar titullin, por të dielën do të ketë test shumë të vështirë.
Mediumet e huaja kanë shkruar të premten se Amir Rrahmani është në dyshim për të luajtur të dielën.
Garë e fortë do të zhvillohet edhe për të zënë një vend që dërgon në Ligën e Kampionëve.
Roma në pozitën e katërt ka 56 pikë.
Milani është i pesti me 53 pikë, kurse Interi ka 51 pikë.
Milani të dielën nga ora 18:00 e pret Leccen, kurse Empoli do të jetë nikoqir i Interit të dielën në mesditë.
Lazio zë pozitën e dytë me 61 pikë.
Të shtunën nga ora 18:00 luan kundër Torinos në shtëpi.
Ciro Immobile sërish nuk do të jetë i pranishëm në sulmin e Lazios.
Ai ishte kthyer nga lëndimi dhe kishte shënuar në vikendin e kaluar në fitoren kundër Spezias, por ka bërë aksident në Romë dhe nuk do të jetë në gjendje të luajë në fundjavë.
Ka pësuar thyerje të brinjëve. Ai u përplas në tramvaj, ndërsa në veturë ishte bashkë me dy vajzat e tij.