Një person ka humbur jetën si pasojë e një aksidenti të rëndë trafiku që ka ndodhur mëngjesin e sotëm në autostradën “Ibrahim Rugova”.
Lajmin për Tëvë1 ka konfirmuar zëdhënësi i Policisë së Kosovës, Baki Kelani, i cili njoftoi se në aksident ishin të përfshirë një kamion me targa vendore dhe një veturë me targa të huaja.
“Sot, rreth orës 07:40, në autostradën ‘Ibrahim Rugova’ në kilometrin e 26-të ka ndodhur një aksident trafiku me pasoja fatale. Në këtë aksident kanë qenë të përfshira një mjet i rëndë transportues–kamion, me targa vendore, dhe një veturë me targa të huaja”, ka deklaruar Kelani.
Sipas tij, drejtuesja e veturës ka ndërruar jetë në vendin e ngjarjes, ndërsa drejtuesi i kamionit ka pësuar lëndime. “Vdekjen e viktimës e ka konstatuar ekipi mjekësor në vendin e ngjarjes”, ka shtuar zëdhënësi i Policisë.
Në vendin e aksidentit kanë dalë njësitë policore, zjarrfikësit dhe ekipet tjera relevante, të cilat kanë qenë të angazhuara në menaxhimin e situatës.
Policia e Kosovës apelon tek të gjithë pjesëmarrësit në komunikacion që të respektojnë rregullat e trafikut dhe të kenë kujdes të shtuar gjatë vozitjes.
