“Ne i njohim me emër kujdestarët e nazistëve ukrainas nga shërbimet perëndimore, kryesisht nga CIA e SHBA-së, të cilët japin këshilla të tilla si vrasja e gazetarëve (rusë)”, u shpreh Vladimir Putini duke folur në një takim të zgjeruar të Bordit të Prokurorisë së Përgjithshme në Moskë.
Ai tha se Perëndimi po e përdor monopolin e tij të hapësirës së informacionit për të luftuar Rusinë, por me pak sukses dhe kështu filloi të përdorë “terrorizmin e hapur”.
“Këtë mëngjes, Shërbimi Federal i Sigurisë (së Rusisë) shtypi aktivitetet e një grupi terrorist që planifikoi të vriste një gazetar të famshëm televiziv rus. Sigurisht që tani ata do ta mohojnë këtë, por faktet dhe provat janë të pakundërshtueshme”, pretendoi shefi i Kremlinit.
Në dekadat e fundit, Rusia vetë është akuzuar për vrasjen e një numri gazetarësh, së bashku me figurat e opozitës dhe këdo që shihet se kërcënon sundimin e Putinit.
Më pas, Putini shprehu habinë për një deklaratë të diplomatëve evropianë që i bënin thirrje Ukrainës ta fitonte luftën me Rusinë në fushën e betejës.
“Për habinë tonë, punonjësit e lartë diplomatikë në Evropë dhe Shtetet e Bashkuara po u bëjnë thirrje satelitëve të tyre ukrainas që të përdorin të gjitha aftësitë e tyre për të fituar në fushën e betejës. Çfarë diplomacie e çuditshme e partnerëve tanë në SHBA dhe në Evropë? Por, ndërsa ata e kuptojnë se kjo është e pamundur, një detyrë tjetër del në plan të parë: të ndajnë shoqërinë ruse, të shkatërrojnë Rusinë nga brenda. Por edhe këtu ka një pengesë, nuk do të funksionojë”, potencoi ai.
Udhëheqësi rus udhëzoi Prokurorinë e Përgjithshme që të luftojë kundër “ekstremizmit”, “të ndalë me vendosmëri çdo veprim që synon të ndërhyjë në punët e brendshme të Rusisë nga jashtë”, të drejtuara në objektiva të tilla si destabilizimi i shoqërisë, nxitja e ksenofobisë ose nacionalizmit militant.
Vladimir Putini gjithashtu bëri thirrje për një përgjigje të menjëhershme ndaj përhapjes së “ideologjisë radikale” në internet, manipulimeve e provokimeve të rendit publik dhe përgatitjes së veprimeve të paligjshme, të cilat – sipas tij – “shpesh organizohen nga jashtë, me informacionet ose paratë që vijnë nga atje”.
“Provokimet flagrante kundër forcave tona të armatosura, duke përfshirë përdorimin e burimeve të mediave të huaja dhe rrjeteve sociale, kërkojnë gjithashtu një hetim të plotë”, u tha Putini hetuesve.
Me vetë Rusinë që po përballet me shumë akuza për krime lufte në Ukrainë, shefi i Kremlinit urdhëroi gjithashtu një hetim të “fakteve masive të shkeljeve të rënda të normave të së drejtës ndërkombëtare nga formacionet neonaziste të Ukrainës (dhe) mercenarëve të huaj”.
“Ne po flasim për vrasjen e civilëve, përdorimin e njerëzve, duke përfshirë fëmijët si mburoja njerëzore, dhe krime të tjera”, shpjegoi ai.
Të paktën 2.435 civilë janë vrarë dhe 2.946 të tjerë janë plagosur nga ushtria ruse që nga fillimi i luftës në Ukrainë, sipas vlerësimeve të Kombeve të Bashkuara, me shifrat reale që dyshohet se mund të jenë shumë më e larta.
Agjencia e Kombeve të Bashkuara për Refugjatët (UNHCR) bën me dije se mbi 5,1 milionë ukrainas kanë ikur në vende të tjera dhe më shumë se 7,7 milionë të tjerë janë zhvendosur brenda vendit. /trt
