Rezoluta e gjenocidit serb/ Meta zhgënjehet nga PS: Keqardhje për deputetët

Ilir Meta

Presidenti Ilir Meta ka reaguar pasi mazhoranca rrëzoi në Kuvend rezolutën e ish-kryeministrit Sali Berisha, që dënon gjenocidin serb në Srebrenicë, në Bosnjë-Hercegovinë.

Meta shprehet tejet i zhgënjyer nga mazhoranca, teksa thotë se seanca e sotme duhet të shprehte me solemnitet dhe vendosmëri të plotë vullnetin e patjetërsueshëm të popullit shqiptar kundër genocidit barbar.

Kreu i Shtetit thekson se ndjehet i keqardhur që deputetë të Kuvendit të Shqipërisë shtrembërojnë në mënyrë të pamerituar dhe nuk përfaqësojnë vullnetin e qytetarëve shqiptarë.

“Tejet zhgënjyes votimi kundër i mazhorancës ndaj projekt-rezolutës së paraqitur në Kuvendin e Shqipërisë për njohjen dhe dënimin e genocidit të serbëve të Bosnje-Hercegovinës në Srebrenicë në Korrik të 1995.

Në kushtet e agresionit të paprovokuar dhe të pajustifikueshëm rus kundër Ukrainës, dhe kur në rajonin tonë vërehen përpjekje të shtuara për të mohuar genocidin serb në Srebrenicë dhe për të glorifikuar kriminelët e luftës, seanca e sotme e Kuvendit të Shqipërisë do të duhet të shprehte me solemnitet dhe vendosmëri të plotë vullnetin e patjetërsueshëm të popullit shqiptar kundër genocidit barbar, që mori jetët e 8372 njerëzve në Srebrenicë.

Jam tejet i keqardhur që deputetë të Kuvendit të Shqipërisë shtrembërojnë në mënyrë të pamerituar dhe nuk përfaqësojnë vullnetin e qytetarëve shqiptarë, të cilët e kanë treguar me vepra se janë kundër spastrimeve etnike, dhe në mbrojtje të lirisë dhe dinjitetit njerëzor”, shkruan Presidenti krahas një fotoje gjatë homazheve, tre vite më parë. /cna