Zëdhënësja e Ministrisë së Jashtme ruse Mariya Zakharova tha se vendet perëndimore duhet të ndalojnë provokimin e histerisë kundër Rusisë.
Mariya Zakharova i bëri vërejtjet për veprimet e Shteteve të Bashkuara të Amerikës (SHBA) dhe NATO-s në Evropë gjatë konferencës së saj javore për shtyp në kryeqytetin Moskë.
Mediat perëndimore po përhapin propagandë se Rusia do të sulmojë Ukrainën, bëri të ditur Zakharova, ndërsa tha se “Fatkeqësisht, lufta për mediat perëndimore nuk ka filluar. Mediat perëndimore u përpoqën maksimalisht që lufta të ndodhë.”
“Nuk ka asnjë provë se sulmi është kryer. Çdo lajm që lexojmë në mediat perëndimore për këtë është një gënjeshtër,” tha ajo.
Duke vënë në dukje se Rusia dhe Ukraina kanë bërë deklarata se lufta nuk do të ndodhë, zëdhënësja tha: “U bëjmë thirrje vendeve perëndimore të ndalojnë provokimin e histerisë antiruse. Kjo histeri është gjithashtu kundër Ukrainës”.
“Ne i bëjmë thirrje Perëndimit të ndalojë dërgimin e armëve në Ukrainë. Këto veprime ndikojnë negativisht në zgjidhjen e çështjes së Donbasit dhe situatën në lidhje me sigurinë dhe stabilitetin në Evropë,” tha ajo.
Duke i bërë një vlerësim deklaratës së Sekretarit të Përgjithshëm të NATO-s Jens Stoltenberg se “ata planifikojnë të vendosin trupa në Rumani”, Zakharova tha: “NATO ka planifikuar për një kohë të gjatë të militarizojë rajonin e Detit të Zi. Aleanca synon ta kthejë këtë zonë bashkëpunimi paqësor në një betejë gjeopolitike dhe zonë të konkurrencës”.
Rusia nuk ka ndërmend të kërcënojë dhe sulmojë vendet e NATO-s, tha ajo, duke theksuar se ata janë në favor të ruajtjes së paqes.
Zakharova përmendi bashkëpunimin energjetik të Rusisë me vendet evropiane, duke vënë në dukje se Shtetet e Bashkuara po përpiqen të dominojnë tregun e gazit natyror dhe për këtë arsye të destabilizojnë situatën rreth Ukrainës.
Shtetet e Bashkuara po përpiqen të bllokojnë projektin e gazsjellësit Rrjedha e Veriut, tha Zakharova, duke shtuar se ata do të vazhdojnë të transportojnë gaz natyror në Evropë. /trt
