Jetesa në majat e pemëve nuk është më një fantazi fëmijësh.
Shtëpitë moderne në pemë, të projektuara nga arkitektë dhe të ndërtuara në pyje anembanë globit, janë kthyer në simbole të reja të luksit të qëndrueshëm, arratisjes nga jeta urbane dhe rikthimit tek natyra.
Ideja e jetesës në pemë ka rrënjë të thella historike.
Që në shekullin e parë pas Krishtit, Plini Plaku përshkruante pemë aq madhështore sa njerëzit organizonin bankete dhe flinin në degët e tyre. Më pas, imagjinata kolektive u ushqye nga letërsia, si romani “Familja Robinson Zvicerane”, dhe nga eksperiencat arboreale që u shfaqën në Francë në shekullin XIX.
Sot, kjo ide ka evoluar ndjeshëm.
Në librin “Modern Tree Houses”, botuar nga Taschen dhe cituar nga BBC, autori Florian Seabeck shkruan se arkitektët bashkëkohorë po e rizbulojnë shtëpinë në pemë jo për kapriço estetike, por për arsye që lidhen me qëndrueshmërinë, intimitetin dhe një marrëdhënie më të ndershme me mjedisin.
“Janë njëkohësisht simbole arratisjeje dhe rikthimi”, thekson Seabeck për BBC.
Artikulli i BBC sjell 10 shembuj mbresëlënës nga vende të ndryshme të botës:
Pigna, në Alpet italiane, dy struktura në formë kone pishe që “të japin ndjesinë sikur po hyn në një përrallë”.
Bert, në Austri, një shtëpi që ngjan më shumë me pemë sesa me banesë dhe zë vetëm dy metra katrorë tokë pylli.
Qiyun Mountain UFO, në Kinë, një strukturë futuriste në formë disku fluturues, e konceptuar për familje.
The Trillium, në Meksikë, që kombinon jetesën në pemë me luksin, përfshirë pishinë dhe jacuzzi.
Biosphere, në Suedi, e mbuluar me 350 shtëpiza për zogjtë, si përgjigje ndaj humbjes së habitatit natyror, sipas BBC.
Loma Mar Tree House, në SHBA, që rikthen frymën e aventurës së fëmijërisë edhe për të rriturit.
Shtëpia në pemë në Bambu Indah, në Bali, e ndërtuar pothuajse tërësisht nga bambuja.
Tree Tent, në Suedi, një “tendë-pemë” e varur, që sipas BBC u ofron vizitorëve një përjetim ku “koha ngadalësohet dhe heshtja merr jetë”.
Woodnest, në Norvegji, një strehë romantike e ndërtuar rreth trungut të një pishe, me pamje nga fjordi.
The Copper Fox, në SHBA, një strukturë skulpturore e ndërtuar nga materiale lokale dhe të ricikluara, që sipas autores “të bën të ndihesh sërish fëmijë”.
Sipas BBC, të gjitha këto projekte, pavarësisht formave të ndryshme, ndajnë të njëjtin mesazh: në një botë të ndërtuar për “më shumë”, shtëpitë në pemë ofrojnë “më pak”, dhe pikërisht aty qëndron vlera e tyre. Ato nuk janë thjesht vende për të fjetur, por për të reflektuar, për të ndryshuar perspektivë dhe për t’u rilidhur me natyrën.
