Së paku 12 emigrantë kanë humbur jetën dhe 12 të tjerë llogariten si të zhdukur në Detin Alboran, i cili ndodhet në perendim të Detit Mesdhe në mes të Spanjës dhe Marokut, raporton Anadolu Agency (AA).
Kryqi i Kuq spanjoll konfiromoi se në një anije janë gjetur 11 trupa, në mesin e të cilëve edhe një grua shtatzënë, ndërsa një tjetër person humbi jetën në spital. Si të zhdukur llogariten 12 persona, përderisa 31 të tjerë u shpëtuan.
Zyrtarët njoftojnë se anija ishte larguar nga Maroku më 18 dhjetor, kurse në këtë pjesë vazhdojnë kërkimet për tre anije të tjera.
Gjithashtu shërbimi detar spanjoll i shpëtimit bëri të ditur se ka gjetur 11 migrantë të vdekur në një varkë jashtë bregdetit jugor të vendit dhe se ka shpëtuar 33 pasagjerë të tjerë.
Ekipet e shpëtimit për dy ditë kërkonin anijen rreth 11 kilometra në jug të bregdetit në Almeria, tha një zyrtar.
Ministri spanjoll i Punëve të Jashtme, Josep Borrell, sot në parlament i bëri thirrje të gjitha partive politike që të ndërpresin “retorikat diskriminuese nacionaliste kundër emigrantëve”.
Sipas të dhënave të Kombeve të Bashkuara (OKB), që nga fillimi i vitit në Spanjë kanë mbërritur mbi 61.500 emigrantë, të cilët ikin nga dhuna dhe varfëria. Rreth 55 mijë kanë mbërritur përmes rrugëve detare.
