Së paku nëntë ushtarë kanë humbur jetën gjatë sulmit të sotëm në mëngjes me bombë në shtetin afrikan të Malit, raporton Anadolu Agency (AA).
Forcat e armatosura të Malit njoftuan se sulmi ndodhi në periferi të qytetit Boulkessy në rajonin Mopti.
Një mjet i improvizuar shpërthyes është aktivizuar në rrugë në momentin e kalimit të autokolonës ushtarake.
Objektiv i sulmit kanë qenë forcat ndërkombëtare G5 Sahel, ndërsa bëhet fjalë për forca të përbashkëta të Malit, Mauritanisë, Nigerit, Çadit dhe Burkina Fasos.
Burimi i njëjtë lajmëron se gjatë shpërthimi të fuqishëm janë vrarë së paku nëntë ushtarë, ndërsa disa të tjerë janë plagosur.
Edhe javën e kaluar në Mali ndodhi një sulm brutal me bombë në të cilin jetën e humbën së paku 17 persona, ndërsa 15 të tjerë u plagosën.
Sulmuesit paraprakisht rrëmbyen dhe vranë një civil nën kufomën e të cilit vendosën një minë, e cila shpërtheu pasi pjesëtarët e familjes e gjetën kufomën.
Mali që nga viti 2012 është bastion i sulmeve separatiste dhe terroriste, ndërsa kriza veçmas është e përhapur në brendësinë dhe në veri të këtij vendi afrikan.