Presidenti i SHBA-së, Donald Trump, është shprehur se është i “shokuar” nga mënyra se si kryeministrja italiane, Giorgia Meloni, “nuk dëshiron të na ndihmojë në luftë”, transmeton Anadolu.
Deklaratat e presidentit amerikan në të përditshmen italiane ‘Corriere della Sera’ erdhën pasi Meloni hodhi poshtë idenë e një shoqërie ku udhëheqësit fetarë ndjekin urdhrat e udhëheqësve politikë, pas kritikave të Trumpit ndaj Papa Leonit.
Trump tha se nuk ka folur me kryeministren Meloni për “një kohë të gjatë”.
“Sepse ajo nuk dëshiron të na ndihmojë me NATO-n, nuk dëshiron të na ndihmojë të heqim qafe armët bërthamore. Është shumë ndryshe nga ajo që mendoja”, tha Trump, duke iu referuar programit të supozuar të Iranit për zhvillimin e armëve bërthamore, të cilin Teherani e mohon.
“Nuk është më i njëjti person dhe Italia nuk do të jetë më i njëjti vend”, theksoi Trump.
Ai gjithashtu vuri në pikëpyetje politikat e brendshme dhe energjetike të Italisë, duke pyetur: “A ju pëlqen fakti që presidenti juaj nuk po bën asgjë për të marrë naftën (iraniane)?” pas deklaratave të tij të përsëritura se mund ta “marrë” naftën e Iranit.
“Nuk mund ta imagjinoj. Jam i shokuar nga ajo. Mendoja se kishte guxim, gabova. Ajo është e papranueshme, sepse nuk i intereson nëse Irani ka armë bërthamore dhe do ta shpërthente Italinë në dy minuta nëse do të kishte mundësi”, tha ai.
Në Itali, figura të opozitës kanë dënuar deklaratat e Trumpit. Elly Schlein, sekretare e Partisë Demokratike, tha se ka pasur “dënim të fortë për sulmin e presidentit Donald Trump ndaj Melonit për shprehjen e solidaritetit ndaj Papa Leonit”.
“Ne jemi kundërshtarë në këtë parlament, por të gjithë qytetarë italianë dhe ne nuk do të pranojmë sulme apo kërcënime ndaj qeverisë dhe vendit tonë”, shtoi ajo.
