Presidenti amerikan Donald Trump deklaroi të enjten se paraardhësi i tij, Barack Obama, bëri publike informacione të klasifikuara kur konfirmoi ekzistencën e jetës jashtëtokësore.
“Ai dha informacione të klasifikuara. Nuk duhet ta bënte këtë,” u tha Trump gazetarëve në Air Force One. “Ai bëri një gabim të madh. I nxori nga informacionet e klasifikuara. Jo, nuk kam ndonjë mendim për këtë. Unë kurrë nuk flas për këtë. Shumë njerëz flasin. Shumë njerëz e besojnë.”
Trump tha se “mund ta nxjerrë nga telashet duke i deklasifikuar” informacionet. Nuk është e qartë se për cilat informacione po flet ai kur pretendon se Obama ka zbuluar materiale të klasifikuara.
Obama deklaroi gjatë një bisede me podkasterin amerikan Brian Tyler Cohen se alienët “janë realë”.
“Janë realë, por unë nuk i kam parë,” tha ai në podkastin e publikuar të shtunën, duke iu përgjigjur një pyetjeje për jashtëtokësorët.
“Ata nuk po mbahen në Area 51; nuk ka ndonjë objekt nëntokësor, përveç nëse ekziston një komplot i madh dhe e kanë fshehur nga presidenti i Shteteve të Bashkuara,” tha Obama.
Obama publikoi më pas një deklaratë në platformën amerikane të rrjeteve sociale Instagram, ku tha se “po përpiqej t’i përmbahej frymës së raundit të shpejtë të pyetjeve”.
“Statistikisht, universi është aq i madh sa gjasat janë të mira që ka jetë diku atje,” tha ai. “Por distancat mes sistemeve diellore janë aq të mëdha sa gjasat që të jemi vizituar nga alienët janë të ulëta, dhe gjatë presidencës sime nuk pashë asnjë provë se jashtëtokësorët kanë pasur kontakt me ne. Vërtet!”
Area 51 është një objekt shumë i klasifikuar i Forcave Ajrore të ShBA-së, i vendosur në Groom Lake në jug të Nevadës. Edhe pse prej kohësh ka qenë subjekt i teorive konspirative që lidhen me jashtëtokësorët, funksioni i tij i vetëm i pranuar zyrtarisht është testimi i avionëve.
