Zjarret masive kanë përfshirë rajonin e Patagonisë në Argjentinë, duke shkatërruar mbi 45 mijë hektarë pyje gjatë një muaji e gjysmë dhe duke detyruar evakuimin e mijëra banorëve dhe turistëve.
Një nga zonat më të goditura është Parku Kombëtar Los Alerces, pjesë e Trashëgimisë Botërore të UNESCO-s, ku ndodhen pemë mbi 2.600 vjeçare. Flakët vazhdojnë të përhapen, ndërsa autoritetet paralajmërojnë se sezoni i zjarreve ende nuk ka arritur kulmin.
Kriza ka nxitur kritika të forta ndaj presidentit argjentinas Javier Milei, për shkak të politikave të tij të ashpra shtrënguese. Sipas të dhënave zyrtare, buxheti i Shërbimit Kombëtar për Menaxhimin e Zjarreve u ul me rreth 80 për qind vitin e kaluar dhe pritet të shkurtohet edhe më tej këtë vit.
Rojet e parqeve dhe zjarrfikësit thonë se mungesa e fondeve, personelit dhe pajisjeve po e bën shumë të vështirë përballimin e situatës. Aktualisht, administrata e parqeve kombëtare ka shumë më pak zjarrfikës sesa numri i rekomanduar për mbulimin e territorit.
Ekspertët theksojnë se ndryshimet klimatike, thatësira dhe temperaturat ekstreme po rrisin rrezikun e zjarreve, ndërsa masat parandaluese janë lënë pas dore.
Presidenti Milei, i cili fillimisht heshti për situatën, shpalli së fundmi gjendjen e jashtëzakonshme dhe liroi fonde për zjarrfikësit vullnetarë. Megjithatë, shumë banorë dhe aktivistë mjedisorë e konsiderojnë reagimin të vonuar dhe dëmet të pariparueshme.
“Dhimbja është e madhe, sepse këto pyje nuk janë vetëm peizazh, por shtëpia jonë,” u shpreh një vullnetare në zonën e prekur, duke shtuar se zemërimi rritet nga viti në vit pasi tragjeditë po përsëriten. /mesazhi
