Frika nga vjedhja dhe manipulimi i votës, siç kishte ndodhur në disa zona në zgjedhjet e përgjithshme të vitit 2014, ka bërë që partitë politike në vend t’i forcojnë radhët e tyre për 11 qershor. Rreth 40 mijë vëzhgues dhe komisionarë pritet të angazhohen për ditën e zgjedhjeve.
Kështu bëjnë të ditur për “Zërin” anëtarët e partive brenda Komisionit Qendror të Zgjedhjeve.nga ana tjetër sa i përket pagesës ata bëjnë të ditur se vëzhguesit paguhen nga vetë partitë politike, kurse për komisionarët dhe stafin tjetër shpenzohet më shumë se gjysma e buxhetit të ndarë për procesin zgjedhor, i cili aktualisht është mbi 5 milionë euro.
Ndërkaq përfaqësuesit e tri blloqeve garuese, koalicionit PDK-AAK-Nisma, koalicionit LDK-AKR-Alternativa dhe lëvizja “Vetëvendosje”, shprehen të bindur se do të dalin fitues në garën e 11 qershorit.Kurse Policia e Kosovës ka bërë të ditur për “Zërin” se tashmë ka gati planin sesi do të veprojë në zgjedhjet e së dielës.
