Skandalet e Botërorit 2026, e kanë dobësuar pozitën e presidentit të FIFA-s përpara zgjedhjeve të vitit 2027
Futbolli është një nga fushat ku ndërthuren sporti, politika dhe pushteti, por ruajtja e këtij pushteti po bëhet gjithnjë e më e vështirë për presidentin e FIFA-s, Gianni Infantino.
Botërori 2026 në Amerikën e Veriut, i prezantuar si turneu më i madh në histori me 48 skuadra pjesëmarrëse, po shndërrohet në një krizë politike që rrezikon autoritetin e tij përpara zgjedhjeve presidenciale të FIFA-s në vitin 2027.
Që në fillim të vitit 2025, marrëdhënia e ngushtë e Infantinos me presidentin amerikan Donald Trump shkaktoi polemika. Pjesëmarrja e tij në ceremoninë e inaugurimit të Trumpit, çmimi simbolik i paqes që FIFA i akordoi presidentit amerikan dhe prania e përbashkët në nisma politike ngritën dyshime mbi pavarësinë e organizatës.
Debatet u shtuan gjatë Botërorit. Kufizimet amerikane për vizat penguan mijëra tifozë, sidomos nga Afrika, të ndiqnin ndeshjet, ndërsa arbitri somalez Omar Artan, i përzgjedhur nga vetë FIFA, nuk u lejua të hynte në SHBA. Edhe kombëtarja e Iranit u detyrua ta vendoste bazën në Meksikë dhe të udhëtonte për çdo ndeshje.
Debati më i madh shpërtheu kur FIFA anuloi pezullimin e sulmuesit amerikan Folarin Balogun pas një kërkese të Trumpit, ndërsa pak ditë më vonë refuzoi të vepronte njësoj për mbrojtësin anglez Jarrell Quansah, në një rast të ngjashëm. Vendimi u interpretua si trajtim i pabarabartë dhe ndikim politik mbi drejtësinë sportive.
Përçarja me Evropën
Infantino drejton FIFA-n që prej vitit 2016 dhe në dy rizgjedhjet e fundit nuk ka pasur kundërshtarë. Por shumë federata evropiane besojnë se gjatë mandatit të tij organizata është bërë më pak demokratike.
Kritikat lidhen me mënyrën se si janë menaxhuar zgjedhjet për presidencën dhe procesi i përzgjedhjes së organizatorëve të Kupave të Botës 2030 dhe 2034. Sipas kundërshtarëve, Infantino ka favorizuar kandidatura unike dhe ka shmangur votimet tradicionale për të minimizuar kundërshtimet.
Ndër zërat më kritikë është presidentja e Federatës Norvegjeze, Lise Klaveness, e cila ka denoncuar qëndrimin pasiv të FIFA-s ndaj konfliktit në Lindjen e Mesme.
Edhe UEFA ka hyrë në një përplasje të hapur me Infantinon. Presidenti i saj, Aleksander Čeferin, shihet nga shumë analistë si kandidati më i mundshëm për ta sfiduar në zgjedhjet e vitit 2027. UEFA ka kundërshtuar vendimet për Balogunin, ka mbështetur arbitrin somalez dhe ka kritikuar mënyrën e drejtimit të FIFA-s.
Mbështetje në rënie
Edhe brenda federatave kombëtare po shtohen shenjat e pakënaqësisë. Sipas mediave britanike, Federata Angleze kishte planifikuar të mbështeste publikisht rizgjedhjen e Infantinos, por u tërhoq pas skandalit Balogun-Quansah.
Në Afrikë, presidenti i Konfederatës Afrikane, Patrice Motsepe, mbetet një aleat i fortë i Infantinos. Megjithatë, shumë figura të futbollit afrikan kritikojnë mbështetjen ndaj tij, duke argumentuar se ajo bazohet më shumë në interesa financiare sesa në zhvillimin e futbollit.
Pakënaqësia është rritur edhe për shkak të trajtimit të tifozëve afrikanë dhe arbitrit Omar Artan, si edhe rasteve si ai i portierit të Kepit të Gjelbër, Vozinha, nëna e të cilit nuk mori vizë për ta ndjekur në stadium.
Edhe në Azi janë shtuar kritikat, sidomos për trajtimin e Iranit dhe qëndrimin e FIFA-s ndaj Palestinës. Megjithatë, Infantino vazhdon të gëzojë mbështetje të rëndësishme nga vendet e Gjirit, veçanërisht Katari dhe Arabia Saudite, të cilat janë partnerë strategjikë dhe sponsorë të rëndësishëm të FIFA-s.
Një e ardhme e pasigurt
Në kontinentin amerikan situata mbetet e paqartë. Ndërhyrja në rastin Balogun ka krijuar tensione edhe me Federatën Braziliane, ndërsa disa federata të Amerikës së Jugut kanë ngritur shqetësime për favorizim ndaj Argjentinës.
Megjithëse është ende herët për të folur për fundin e epokës së Gianni Infantinos, pozita e tij është dukshëm më e dobët se një vit më parë. Zgjedhjet e vitit 2027 mund të jenë sfida e parë reale për presidentin e FIFA-s pas më shumë se një dekade në pushtet.
Edhe nëse rizgjidhet, mandati i ardhshëm pritet të jetë i fundit, përveç nëse ndryshohen rregullat e organizatës. \tesheshi
