Autoriteti Palestinez ka dënuar ashpër vizitën e Kryetarit të Dhomës së Përfaqësuesve të SHBA-së, Mike Johnson, në vendbanimin izraelit të paligjshëm Ariel në Bregun Perëndimor të pushtuar. Gjatë vizitës, Johnson e cilësoi territorin palestinez si “pronë legjitime e popullit hebre”.
Në një deklaratë të publikuar në rrjetin X, Ministria e Jashtme palestineze e quajti vizitën dhe deklaratat e tij “nxitëse” dhe “shkelje të hapur të së drejtës ndërkombëtare dhe rezolutave të legjitimitetit ndërkombëtar”.
“Ministria e konsideron këtë si një nxitje të krimeve të vendbanimeve, veprimeve të kolonëve dhe konfiskimit të tokave palestineze, duke qenë në kundërshtim të qartë me qëndrimin zyrtar të SHBA-së për vendbanimet dhe sulmet e kolonëve,” thuhet në deklaratë.
Po ashtu, autoritetet palestineze paralajmëruan se veprime të tilla minojnë përpjekjet arabe dhe amerikane për të ndalur luftën, për të thyer ciklin e dhunës dhe për të arritur qetësinë në rajon.
