Ashtu siç pritej, Bayern Munich ka shënuar fitore të lehtë, në përballjen kundër Mainz.
Bayern ka shënuar fitore me rezultatin 6:1, fitore kjo që erdhi me përmbysje, pasi fillimisht kampionët e gjetën vetën në disavantazh.
Ishte minuta e 6’ e takimit kur Jean Paul Boetius zhbllokoi takimin, për t’i dhënë epërsinë skuadrës së Mainz, epërsi kjo që nuk diti të menaxhohej siç duhet.
Mbrojtësi i transferuar këtë verë tek Bayern, Benjamin Pavard, ishte ai që barazoi shifrat, kur po luhej minuta e 36’, shkruan lajmi.net.
Në minutën e fundit të pjesës së parë, David Alaba shënoi një gol të bukur nga gjuajtja e lirë, për ta quar skuadrën me epërsi në pushimin mes dy pjesëve.
Pjesa e dytë i takoi në tërësi skuadrës së Bayern, të cilët realizuan edhe katër gola të tjerë për të vulosur fitoren në xhiron e tretë.
Kroati Ivan Perisic ishte ai që realizoi golin e tretë të skuadrës së tij në këtë takim, në minutën e 54’, për t’i dhënë qetësi skuadrës së tij.
Serinë e golave e vazhdoi Kingsley Coman, kur në minutën e 64’, pas asistimit të Joshua Kimmich, tundi rrjetën e Mainz.
Lewandowski në minutën e 78’ dhe Alphonso Davies në minutën e 80’ realizuan dy golat që vulosën rezultatin e thellë të këtij takimi.
Me këtë fitore, Bayern ngritët në kuotën e shtatë pikëve, duke qëndruar në pozitën e dytë, me dy pikë më pak se Leipzig.
