Çmimet evropiane të gazit gjatë ditës së premte u rritën në nivelet më të larta të të gjitha kohërave, pasi Rusia uli furnizimin, duke sinjalizuar presione të mëtejshme të çmimeve ndaj konsumatorëve evropianë që po shkojnë drejt sezonit të dimrit.
Sipas të dhënave nga operatori i rrjetit Gascade, Gazprom (GAZP.MM) e kontrolluar nga Kremlini rezervoi vetëm një të tretën e kapacitetit të tij në dispozicion për tetorin.
Më 1 tetor, çmimi i gazit në qendrën holandeze TTF, një pikë referimi në Evropë, ka arritur maksimumin e të gjitha kohërave prej 97.73 euro megavat për orë (MWh).Kjo shifër përbën rritje prej 400 për qind këtë vit.
Kërkesa për gaz është rritur, sidomos në kohën kur kontinenti po përballet me rimëkëmbjen prej pandemisë dhe me një konkurrencë të ashpër për furnizime nga blerësit aziatikë, pavarësisht çmimeve rekord pasi fillon sezoni i dimrit.
Të gjithë këta faktorë kanë ndikuar në zvogëlim të rezervave të gazit natyror.
Sidoqoftë, Gazprom i cili është furnizues kryesor i gazit në Evropë ndeshet me kritika. Një grup ligjvënësish të Parlamentit Evropian i kanë kërkuar Komisionit Evropian që të hetojë rolin e kompanisë në rritjen e çmimeve, duke thënë se sjellja e saj i ka bërë ata të dyshojnë për manipulim të tregut dhe një “përpjekje për t’i bërë presion” Evropës për të rënë dakord për nisjen e shpejtë të gazsjellësit të saj Nord Stream 2.
Kremlini përsëriti se Gazprom, po përmbushte të gjitha detyrimet e tij të kontratës. /euronews
