Deputetë në Mbretërinë e Bashkuar i kanë bërë thirrje qeverisë që të qëndrojë jashtë konfliktit në përshkallëzim mes Izraelit dhe Iranit, duke paralajmëruar kundër çdo forme mbështetjeje ushtarake pa miratim të qartë parlamentar.
Duke folur në Parlament, deputetja laburiste Abtisam Mohamed tha:
“Duke qenë se pretendimet e Izraelit janë vënë në dyshim, madje edhe nga vlerësime të inteligjencës amerikane, a mund të na sigurojë sekretari i jashtëm se nuk do të jepet asnjë mbështetje ushtarake – as direkte, as indirekte – pa pëlqimin e qartë të kësaj Dhome? Dhe se kjo qeveri ka mësuar nga gabimet tragjike të Irakut dhe Libisë?”
Në përgjigje, sekretari i jashtëm David Lammy deklaroi se:
“Mbretëria e Bashkuar nuk është e përfshirë në sulmet e Izraelit. Kjo është e qartë.”
Megjithatë, ai shtoi se Britania mban një rol rajonal, përmes pranisë ushtarake në Qipro, Bahrein dhe Katar.
Ndërkohë, deputeti laburist Barry Gardiner kërkoi sqarime mbi burimet e informacionit për programin bërthamor iranian, duke e pyetur Lammy-n nëse qeveria britanike kishte kërkuar verifikim të pavarur nga Agjencia Ndërkombëtare për Energji Atomike (IAEA).
“Dështimi për të siguruar informacion transparent nga UNSCOM dhe UNMOVIC shkaktoi pasoja të rënda 22 vjet më parë,” paralajmëroi Gardiner, duke iu referuar luftës në Irak.
Debati në Parlament pasqyron shqetësimet në rritje brenda politikës britanike për rrezikun që vendi të tërhiqet në një tjetër konflikt në Lindjen e Mesme, pa llogaridhënie demokratike dhe pa garanci ligjore ndërkombëtare. /mesazhi
