Inaugurohet faza e parë e Qendrës Financiare të Istanbulit, projektit historik të Turqisë

Faza e parë e projektit historik të Turqisë, Qendra Financiare e Istanbulit (IFC), e cila do të jetë seli e huadhënësve, u inaugurua zyrtarisht të hënën, raporton Anadolu.

Huadhënësit publikë Ziraat Bank, Halkbank dhe VakıfBank do të zhvendosin selitë e tyre në sektorin bankar.

Duke folur në ceremoninë e inaugurimit, Ministri i Thesarit dhe Financave Nurettin Nebati tha: “IFC-ja pritet të rrisë eksportet e shërbimeve financiare të Turqisë me tri herë deri në vitin 2036 dhe kontributet e saj në produktin e brendshëm bruto të vendit mund të arrijnë 130 miliardë dollarë brenda 15 viteve”.

IFC-ja do të gjenerojë 102.000 vende të reja pune të kualifikuara gjatë periudhës 15-vjeçare, shtoi ai.

Një gamë e gjerë institucionesh, nga bankat tek kompanitë e sigurimeve, do të bashkohen në një lokacion të vetëm nën IFC-në.

Projekti IFC, i drejtuar nga Fondi i Pasurisë i Turqisë dhe i zhvilluar në koordinim me Ministrinë e Mjedisit, Planifikimit Urban dhe Ndryshimeve Klimatike, filloi në vitin 2009.

IFC-ja do të jetë selia e institucioneve më të shquara financiare të Turqisë, si Banka Qendrore, Bursa Istanbulit, Agjencia e Rregullimit dhe Mbikëqyrjes Bankare dhe Bordi i Tregjeve të Kapitalit të Turqisë.

Qendra moderne ka 1,4 milion metra katrorë hapësirë ​​zyrash, një qendër tregtare prej 100.000 metrash katrorë, një qendër konferencash dhe performancash për 2.100 njerëz, një hotel me pesë yje me një sipërfaqe prej 30.000 metrash katrorë dhe një parking me kapacitet prej 26.000 automjetesh.

Projekti përfshin gjithashtu shtigje për ecje, parqe dhe zona rekreative për të rritur cilësinë e punës dhe të jetës.

Institucionet financiare në IFC do të gëzojnë disa avantazhe tatimore, duke përfshirë 75 për qind të të ardhurave të tyre të zbritura nga baza tatimore e korporatave.

Ato gjithashtu do të kenë përjashtime nga tarifat dhe pullat.