Indonezia ka bërë thirrje për respektimin e integritetit territorial të Jemenit dhe ka vlerësuar përpjekjet për ruajtjen e stabilitetit, mes rritjes së tensioneve në vend. Deklarata vjen një ditë pasi Arabia Saudite bombardoi një dërgesë armësh nga Emiratet e Bashkuara Arabe në portin jemenas të Al-Mukallës, e cila sipas Riadit ishte e destinuar për forcat separatiste.
Sulmi ajror “i kufizuar” u krye të martën në provincën jugore Hadramout, pas mbërritjes së dërgesës nga Emiratet, në një kohë tensionesh të shtuara për shkak të avancimeve të Këshillit Tranzicional Jugor (STC), i mbështetur nga Emiratet.
Në një deklaratë të publikuar të mërkurën vonë, Ministria e Jashtme e Indonezisë tha se “vlerëson përpjekjet e mëtejshme të palëve të përfshira për të ruajtur stabilitetin dhe sigurinë”, veçanërisht në provincat Hadramout dhe Al-Mahara.
Jakarta theksoi rëndësinë e një zgjidhjeje paqësore përmes dialogut politik gjithëpërfshirës nën koordinimin e Kombeve të Bashkuara, duke respektuar qeverinë legjitime të Jemenit dhe integritetin e tij territorial.
Indonezia u bëri gjithashtu thirrje të gjitha palëve të tregojnë përmbajtje dhe të shmangin veprime të njëanshme që mund të përkeqësojnë situatën e sigurisë dhe vuajtjet e popullit jemenas. /mesazhi
