Kryeministri palestinez Mohammed Istiyye i bëri thirrje komunitetit ndërkombëtar të krijojë një proces politik për të shpëtuar opsionin e zgjidhjes me dy shtete midis Palestinës dhe Izraelit.
Kryeministri mirëpriti ministren e Jashtme norvegjeze Anniken Huitfeldt dhe të dërguarin e posaçëm të Procesit të Paqes norvegjezin John Hensen në zyrën e tij në Ramallah, njoftoi agjencia zyrtare palestineze “WAFA”.
Gjatë takimit, Istiyye i kërkoi komunitetit ndërkombëtar të krijojë një proces politik për të shpëtuar opsionin e zgjidhjes me dy shtete midis Palestinës dhe Izraelit.
Ai kërkoi presion serioz ndërkombëtar mbi Izraelin që të ndalojë shkurtimet e fondit të taksave të qeverisë palestineze, të lirojë paratë që ka ndaluar dhe të respektojë marrëveshjet e nënshkruara.
Duke theksuar se bashkësia ndërkombëtare nuk duhet të zbatojë standarde të dyfishta në trajtimin e çështjes palestineze, Istiyye nënvizoi se është e domosdoshme që ligji ndërkombëtar dhe rezolutat e Këshillit të Sigurimit të Kombeve të Bashkuara të zbatohen për çështjet palestineze.
Ai bëri thirrje për mobilizimin e mbështetjes financiare për Palestinën pasi kriza financiare me të cilën po përballet e bën qeverinë të paaftë për të përmbushur detyrimet e saj.
Deri në vitin 2013, mbështetja e drejtpërdrejtë e thesarit palestinez ishte rreth një miliard dollarë. Rreth një e treta e kësaj erdhi nga Shtetet e Bashkuara, një e treta nga Bashkimi Evropian dhe një e treta nga vendet arabe, kryesisht Arabia Saudite.
Mbështetja e SHBA-së është ndalur plotësisht që nga viti 2018, ndërsa mbështetja arabe ka rënë në vitin 2020 dhe është ndalur plotësisht në vitin 2021, ndërsa më pas edhe mbështetja evropiane është ndërprerë. /trt
