Shoqata Palestinëse e të Burgosurve ka paralajmëruar për një “plan të rrezikshëm” që, sipas saj, synon eliminimin e liderit të burgosur palestinez Marwan Barghouti brenda burgjeve izraelite, ndërkohë që po shtohen akuzat për dhunë të rëndë ndaj tij dhe thirrjet ndërkombëtare për lirimin e menjëhershëm.
Amjad al-Najjar, drejtor i shoqatës, deklaroi se “rritja e sulmeve ndaj Marwan Barghoutit, në të njëjtën kohë me lëvizjet dhe thirrjet ndërkombëtare për lirimin e tij, tregon qëllime të rrezikshme të qeverisë së okupimit për të hequr qafe atë gjatë ndalimit, në një krim të shumëfishtë dhe shkelje flagrante të së drejtës humanitare ndërkombëtare”.
Ai bëri thirrje që OKB-ja dhe organizatat ndërkombëtare të ndërhyjnë urgjentisht, të dërgojnë një komision hetimor për të vizituar Barghoutit në izolim të plotë dhe të ushtrojnë presion real për lirimin e tij.
Akuzat për dhunë të rëndë
Qassam Barghouti, djali i liderit të burgosur, shkroi në Facebook se një ish-i burgosur i kishte treguar se forcat izraelite “ia kanë shtypur trupin, i kanë thyer dhëmbët, brinjët dhe gishtat, dhe i kanë prerë një pjesë të veshit” gjatë dhunës brenda burgut. Ai tha se nuk ka mundur të marrë më tej kontakt me burimin.
Reagimi i Presidencës Palestinaze
Presidenca Palestinaze dënoi “sulmet e vazhdueshme dhe masat ndëshkuese të rrezikshme” ndaj Barghoutit, duke mbajtur qeverinë izraelite përgjegjëse për sigurinë e tij dhe të gjithë të burgosurve. Ajo i bëri thirrje komunitetit ndërkombëtar dhe Kryqit të Kuq të veprojnë menjëherë.
Kërcënimet e mëparshme dhe konteksti politik
Më 18 shkurt, ministri izraelit Itamar Ben-Gvir kishte hyrë në qelinë e Barghoutit duke e kërcënuar me vdekje, sipas pamjeve të publikuara në atë kohë. Barghouti shihet shpesh si një figurë unifikuese mes palestinezëve dhe mbështetës i zgjidhjes me dy shtete.
Qeveria e Benjamin Netanyahut vazhdon të kundërshtojë krijimin e një shteti palestinez, ndërsa më 23 tetor presidenti amerikan Donald Trump tha se do të shqyrtonte mundësinë e angazhimit për lirimin e Barghoutit, por pa marrë një vendim.
Mbi 10,000 palestinezë mbeten në burgjet izraelite, mes tyre gra dhe fëmijë, dhe “vuajnë tortura, uri dhe neglizhencë mjekësore”, sipas raporteve të të drejtave të njeriut. /mesazhi
