Roma do të jetë në telashe gjatë afatit kalimtar të dimrit, pasi do të përballet me oferta të majme nga klubet gjigante të Evropës për transferimin e talentit të saj, Cengiz Under.
21-vjeçari turk ka kohë që ndiqet nga Bayern e Arsenal, por tashmë edhe Barcelona e Manchester City kanë shfaqur interes për shërbimet e tij, shkruan Corriere dello Sport.
Ünder ka shënuar 2 gola në Champions League këtë sezon dhe që tani vlera e tij në treg ka arritur nivele të frikshme, por paga e tij te Roma është shumë e ulët, vetëm 1 milion euro, shumë më pak se titullarë të tjerë apo rezerva te Roma.
Agjenti Fali Ramadani e di mirë çfarë xhevahiri ka në dorë dhe do të marrë maksimumin. Takimet me Monchin kanë qenë të shumta, kontrata aktuale mbaron në vitin 2022, por duhet një rritje e konsiderueshme page.
Hipoteza e firmës së rinovimit vare nga klauzola që Roma do të përfshijë në kontratë, sepse me 50 milionë euro e lart gjithçka bëhet e mundur. Roma do ishte e gatshme ta shiste për shifra të tilla, Ünder do ishte i lumtur të shkonte në Angli, Spanjë apo Gjermani. /RTK
