Kancelarja gjermane, Angela Merkel, me gjasë do të dorëhiqet vitin e ardhshëm, për t’i hapur rrugën një qeverie të re koalicioni, deklaroi të mërkurën ish-ministri i Jashtëm i Gjermanisë, Sigmar Gabriel, raporton Anadolu Agency (AA).
“Vendimi i Angela Merkel për të hequr dorë nga kreu i CDU-së, sipas të gjitha gjasave është hapi i parë”, tha Gabriel, në një opinion të tij të botuar në javoren Die Zeit.
Politikani socialdemokrat, i cili mbajti postin e ministrit të Jashtëm në qeverinë e mëparshme të koalicionit të udhëhequr nga kancelarja Merkel, tha se tashmë po pret hapat e radhës.
“Ajo dëshiron të hapë rrugë për një koalicion të ri “Xhamajka” midis CDU/CSU-së, FDP-së liberale dhe të Gjelbërve, duke hequr dorë nga posti i kancelares.
Gabrieli parashikoi se Merkel do të dorëhiqet më së largu pas zgjedhjeve të Parlamentit Evropian në maj të vitit 2019.
Kancelarja gjermane dhe kryetare e Unionit Kristiandemokratik (CDU), Angela Merkel, njoftoi të hënën se nuk do të kandidojë për postin e kryetares së partisë në kongresin që do të mbahet në muajin dhjetor e as në zgjedhjet e vitit 2021 për kancelare të Gjermanisë.
