Autoriteti rregullator i telekomunikacionit i Pakistanit ka bllokuar shërbimin e enciklopedisë ndërkombëtare Wikipedia në internet për shkak të publikimit dhe mosheqjes së përmbajtjes blasfemike, tha një zyrtar i vendit, raporton Anadolu.
Autoriteti i Telekomunikacionit i Pakistanit (PTA) ka bllokuar Wikipedia-n pasi nuk arriti të përmbushë afatin 48-orësh të caktuar të mërkurën për të hequr përmbajtjen sakrilegjike.
“Po, e kemi bllokuar shërbimin sepse Wikipedia nuk e ka bllokuar apo hequr përmbajtjen blasfemike”, tha një zyrtar i lartë për Anadolu përmes telefonit.
“Autoriteti i Telekomunikacionit i Pakistanit (PTA) iu drejtua Wikipedia-s për bllokimin/heqjen e përmbajtjes në fjalë duke lëshuar një njoftim në përputhje me ligjin në fuqi dhe urdhër(at) gjyqësore. U sigurua gjithashtu një seancë dëgjimore, por platforma nuk iu përmbajt duke hequr përmbajtjen blasfemike ose duke u paraqitur para autoritetit”, thuhet në një deklaratë.
PTA kishte paralajmëruar më parë Wikipedia-n se nëse udhëzimet nuk do të ndiqen, shërbimet e saj do të bllokoheshin brenda Pakistanit dhe rikthimi i saj do të rishikohej në varësi të bllokimit ose heqjes së përmbajtjeve të raportuara sakrilegjike.
Autoriteti rregullator kishte degraduar shërbimet e Wikipedia-s në vend në të njëjtën ditë kur kishte vendosur një afat për të bllokuar ose hequr përmbajtjen sakrilegjike.
Autoriteti tha në deklaratën e tij të mëparshme se “duke pasur parasysh dështimin e qëllimshëm të platformës për të respektuar udhëzimet e PTA-së, shërbimet e Wikipedia-s janë degraduar për 48 orë me drejtimin për të bllokuar/hequr përmbajtjen e raportuar”.
