Presidenti i Çekisë, Petr Pavel, ka deklaruar se Evropa aktualisht nuk është në gjendje të zëvendësojë rolin ushtarak të SHBA-së brenda NATO-s nëse Washingtoni do të tërhiqte forcat e tij, si dhe ka paralajmëruar se nevojitet koordinim më i ngushtë në një kohë kur lidhjet transatlantike të mbrojtjes përballen me tensione dhe pasiguri në rritje.
Duke folur për Anadolu në margjinat e Konferencës së Sigurisë në Mynih, Pavel tha se SHBA-ja mbetet thelbësore për arkitekturën e sigurisë së aleancës.
“SHBA-ja përfaqëson një pjesë të rëndësishme të mbrojtjes së NATO-s dhe nëse e gjithë prania dhe kapacitetet amerikane do të tërhiqeshin sot, atëherë mund të themi se Evropa nuk do të jetë në gjendje ta mbushte këtë boshllëk”, tha Pavel.
Komentet e tij vijnë në mes të debateve të ripërtërira në Evropë mbi autonominë strategjike dhe shqetësimeve se Washingtoni mund të zvogëlojë angazhimet e tij, duke rritur presionin mbi aleatët evropianë për të forcuar kapacitetet e tyre.
Megjithatë, Pavel theksoi se aleanca me 32 anëtarë funksionon mbi bazën e partneritetit dhe konsultimit, jo përmes ndryshimeve të menjëhershme.
“Si partnerë dhe aleatë, ne gjithmonë veprojmë në koordinim”, tha ai.
Ai shprehu mbështetje për forcimin e asaj që e quajti shtylla evropiane e NATO-s, me kusht që çdo tranzicion të menaxhohet me kujdes dhe të komunikohet paraprakisht.
“Besoj fuqishëm se ideja për forcimin e shtyllës evropiane të NATO-s do të koordinohet mirë, në mënyrë që për çdo kapacitet që SHBA-ja mund të dëshirojnë të tërheq, ne të informohemi për afatet kohore, të cilat duhet të jenë mjaftueshëm realiste që vendet evropiane të ndërtojnë kapacitetet e tyre mbështetëse, në mënyrë që të mund të mbrohemi në mënyrë efektive edhe nëse SHBA-ja vendos të reduktojë pjesërisht ose tërësisht praninë e saj në Evropë”, tha Pavel.
Ai shtoi se me përgatitje dhe afate realiste, Evropa mund të marrë gradualisht më shumë përgjegjësi për mbrojtjen e saj, edhe nëse SHBA-ja vendos të zvogëlojë praninë e vet.
