Rama u përgjigjet sharjeve që iu bënë për draftin e Asociacionit

Pas reagimeve të ndryshme për çështjen e draftit të përgatitur nga kryeministri i Shqipërisë, Edi Rama për Asociacionin e Komunave me shumicë Serbe (AKS), ai i është përgjigjur kritikëve duke thënë se ata që e shajnë këtë draft, pa e njohur, kanë frikë se humbin armikun që iu krijon kushte të flasin si në llogore.

“Ata që shajnë e akuzojnë pa e ditur fare çka përmban draft-Statuti i Asociacionit kanë frikë vetëm nga një gjë: Se mos humbasin armikun që u krijon kushtin ekzistencial që të flasin dhe të sillen si në llogore, ndërkohë që lufta ka mbaruar në 1999 dhe armiku është mundur”, ka shkruar Rama në Twitter.

Partitë në pushtet dhe opozitë në Kosovë kanë shprehur qëndrime të ndryshme sa i përket draft-statutit për Asociacionin e Komunave me shumicë Serbe në Kosovë, të propozuar nga kryeministri Rama.

Kryeministri Rama ka deklaruar të enjten se e ka dorëzuar një draft të Asociacionit të komunave me shumicë serbe, te presidenti francez Emmanuel Macron, dhe kancelari gjerman, Olaf Scholz.

Për këtë dokument, ai ka thënë se i ka vënë në dijeni edhe presidentin e Këshillit Evropian dhe amerikanët.