Numri i palestinezëve të vrarë nga sulmet izraelite në Rripin e Gazës është rritur në 71.271, transmeton Anadolu.
Ministria e Shëndetësisë e Gazës lëshoi një deklaratë me shkrim duke ndarë shifrat e fundit mbi viktimat dhe trupat e nxjerrë nga rrënojat pas sulmeve izraelite.
Në 24 orët e fundit, trupat e dy palestinezëve, njëri prej të cilëve u nxor nga rrënojat, dhe një person i plagosur u transportuan në spitale.
Që nga hyrja në fuqi e armëpushimit, 416 persona janë vrarë, 1.153 janë plagosur dhe 683 trupa janë nxjerrë nga rrënojat.
Gjithashtu thuhet se numri i përgjithshëm i të vrarëve që nga fillimi i sulmeve të Izraelit në Rripin e Gazës në tetor 2023 është 71.271 ndërsa numri i të plagosurve është 171.233.
– Marrëveshje për armëpushim dhe shkëmbim të burgosurish në Gaza
Presidenti i SHBA-së, Donald Trump njoftoi më 9 tetor se Izraeli dhe Hamasi kishin miratuar fazën e parë të një plani armëpushimi në Gaza gjatë negociatave të vazhdueshme në Egjipt.
Marrëveshja, e nënshkruar në Egjipt, hyri në fuqi më 10 tetor me miratimin e qeverisë izraelite.
Pavarësisht armëpushimit në Rripin e Gazës, ushtria izraelite vazhdon të kryejë sulme kundër palestinezëve pothuajse çdo ditë me pretekste të ndryshme.
