Delegacionet ukrainase dhe ruse do të takohen sot për një raund tjetër bisedimesh, pasi Kievi refuzoi një ultimatum nga Moska që qyteti port i Mariupolit të dorëzohej brenda natës.
Rusia u kishte bërë thirrje trupave ukrainase në Mariupol që të linin armët dhe të largoheshin sot në mëngjes, dhe caktoi një afat në orën 05:00 (0200 GMT) që Ukraina të përgjigjej.
Zëvendëskryeministrja e Ukrainës Iryna Vereshchuk tha për ”Ukrayinska Pravda” se përgjigjja se nuk do të kishte dorëzim i ishte komunikuar Moskës.
”Dy vendet duan të fillojnë bisedimet, të cilat do të zhvillohen virtualisht sot në mëngjes”, tha këshilltari presidencial ukrainas Mykhailo Podoliak.
“Grupet e punës së të dyja palëve kanë punuar intensivisht kohët e fundit”, tha ai.
Bisedimet e nivelit të lartë të paqes u mbajtën të hënën e kaluar.
Podoliak beson se pozicioni i Moskës po bëhej “më i arsyeshëm” dhe ”më realist”.
Ai nuk dha detaje të tjera. /atsh
