Shqipëria dhe Mali i Zi iu bashkuan zyrtarisht Iniciativës së Tre Deteve (3SI) të hënën gjatë samitit jubilar të dhjetë që u mbajt në Varshavë, duke e çuar numrin e anëtarëve të kësaj platforme rajonale në 15 vende nga rajonet e Adriatikut, Balltikut dhe Detit të Zi.
Presidenti polak Andrzej Duda, mikpritësi i samitit, theksoi se pranimi i Malit të Zi dhe Shqipërisë vjen në një moment të ndjeshëm gjeopolitik, veçanërisht në dritën e luftës në kufijtë lindorë të Polonisë.
“Samiti i këtij viti është veçanërisht i rëndësishëm për shkak të situatës aktuale gjeopolitike. Besoj se anëtarët e rinj do të kontribuojnë në një bashkëpunim më të frytshëm”, tha Duda në një darkë pune me presidentët dhe kryeministrat e shteteve anëtare.
Iniciativa, e nisur nga Polonia dhe Kroacia në vitin 2015, fillimisht kishte për qëllim forcimin e bashkëpunimit ekonomik dhe infrastrukturës në Evropën Qendrore dhe Lindore, por u konceptua gjithashtu si një kundërpeshë politike joformale ndaj ndikimit të Berlinit dhe Parisit brenda BE-së.
Sot, Nisma ka 143 projekte infrastrukturore prioritare, duke përfshirë ndërlidhësit e gazit me Lituaninë dhe Sllovakinë, autostradën Via Carpatia dhe korridorin hekurudhor Baltik-Adriatik. Projektet kryesore të energjisë, siç janë terminalet e LNG-së në Kroaci dhe Poloni, u financuan nga Bashkimi Evropian.
