Rama nxjerr prapë karriget, do patjetër disa grevëthyes dhe kërcënon
Kryeministri Edi Rama ka rikthyer karriget përpara Kryeministrisë, duke përsëritur ftesën për “dialog” me studentët dhe pedagogët, të cilët e refuzuan një ditë më parë ofertën e tij dhe vijojnë të kërkojnë dorëheqjen e kreut të qeverisë.
Përmes një videoje të publikuar në Facebook, Rama këmbënguli se dialogu mbetet rruga për zgjidhjen e pakënaqësive, ndërsa paralajmëroi pasoja ligjore dhe financiare për këdo që dëmton pronën publike apo private gjatë protestave.
“Ka një mijë e një pakënaqësi, një mijë e një halle, një mijë e një probleme, mund të ketë edhe 1001 arsye për të protestuar, por asnjë arsye nuk e justifikon dhunën”, deklaroi kryeministri, duke e paraqitur dialogun si mënyrën e vetme për të gjetur zgjidhje.
Ai u shpreh se e drejta për të protestuar është e pamohueshme, por shtoi se dhuna është krim i ndëshkueshëm. “Distancohuni nga dhuna dhe çdo dhunues do të marrë përgjigje. Përgjigja do të jetë konstante, ligjore dhe financiare. Kush dëmton pronën e përbashkët dhe pasurinë e tjetrit do të paguajë”, paralajmëroi Rama.
Megjithatë, kryeministri nuk dha ndonjë sinjal për tërheqje nga qëndrimi i tij, ndërsa studentët dhe pedagogët vazhdojnë të këmbëngulin në kërkesën për largimin e tij nga pushteti.
Ai ofron “kulaçin” e dialogut me njërën dorë, ndërsa me tjetrën tund “kërbaçin” e ndëshkimeve financiare dhe ligjore. Mesazhi është i qartë: mund të flisni, por me kushtet e mia; mund të protestoni, por mos guxoni të prekni pushtetin përtej kufijve që caktoj unë.
Kjo është logjika e një pushteti që e ngatërron dialogun me bindjen ndaj tij. Rama kërkon që protestuesit të ulen në karriget e veta, por nuk jep asnjë shenjë se është i gatshëm të lëshojë politikisht përballë kërkesave të tyre.
Ai flet për bashkëjetesë demokratike, ndërsa refuzon të pranojë se edhe kërkesa për dorëheqjen e një kryeministri është pjesë e kësaj demokracie.
I trimëruar nga masat e ashpra të ndërmarra nga homologët e tij, Giorgia Meloni në Itali dhe Emmanuel Macron në Francë, Rama duket i vendosur ta zgjasë shfaqjen.
Por asnjë masë ndëshkuese, sado drakoniane, nuk mund ta zëvendësojë legjitimitetin politik që fitohet duke dëgjuar qytetarët.
Sigurisht, dhuna dhe dëmtimi i pronës duhen trajtuar sipas ligjit, pa standarde të dyfishta. Por ky parim nuk mund të përdoret si mjegullnajë për të shmangur thelbin e protestës.
Karriget mund të vendosen e të hiqen sa herë të dëshirojë Rama. Ajo që nuk mund të vendosë ai me urdhër është kufiri i durimit të një brezi që nuk pranon më t’i diktohen rregullat e lojës nga një njeri i vetëm. /tesheshi.com/
