Xhudistet kanë siguruar edhe një medalje për Kosovën në Lojërat Mesdhetare që po mbahen në Oran të Algjerisë. Është Flaka Loxha që ka fituar medaljen e bronztë në kategorinë deri 57 kilogramë.
Flaka ishte bartëse e tretë, ndërsa ditën e nisi keq. Humbi nga italiania Giulia Caggiano me Ippon. Dueli ishte çerekfinal dhe kështu Flaka e kishte rastin që përmes repesazhit të fitoi të bronztën. Dhe këtë e bëri.
Ajo u përgjigj me Ippon në luftën e dytë, duke e mposhtur spanjollen Maria Ruiz Muro. Për vend të tretë, Flaka Loxha u përball me turken Hasret Bozkurt, që ishte bartësja e pestë. Ndaj saj fitoi me hedhje në kohën shtesë. Lufta ishte e fortë, por Flaka shfaqi më shumë.
Për Flakën, 23-vjeçaren nga Peja, ky është prej sukseseve më të mëdha në karrierë. Ajo po fiton përvojën e duhur në nivelin e të rriturave. Vjet fitoi medalje të bronztë në Evropianin U23, ndërsa medalje të bronztë ka edhe në Evropianin e junioreve. Ka edhe suksese tjera te të rejat.
Të mërkurën ka garuar edhe Erza Muminoviq. Ajo kishte një fitore e dy humbje në kategorinë deri 48 kilogramë dhe mbeti pa medalje.
Të enjten e të premten garojnë edhe Loriana Kuka, Akil Gjakova, Laura Fazliu, Arbër Kullashi e Shpati Zekaj. Dhe të tjera medalje priten prej nxënësve të trajnerit Driton Kuka.
Në Lojërat e kaluara Mesdhetare, Kosova përmes xhudos i kishte fituar katër medalje. Kjo shifër mund të tejkalohet në Oran.
