Turqia ka nisur nga qyteti bregdetar i Mersinit anijen e gjashtë të quajtur “Anija e Mirësisë”, që transporton 2,600 tonë ndihma humanitare për popullin sudanez të zhvendosur nga konflikti i vazhdueshëm në vend.
Anija u përgatit nën koordinimin e Autoritetit Turk për Menaxhimin e Fatkeqësive dhe Emergjencave (AFAD), në bashkëpunim me autoritetet lokale, organizata të shoqërisë civile dhe Fondin e Zhvillimit të Katarit.
Kreu i AFAD, Ali Hamza Pehlivan, tha se Turqia nuk ka qëndruar e palëvizur përballë krizës humanitare në Sudan, duke kujtuar se vitin e kaluar u dorëzuan 5,500 tonë ndihma dhe 30,000 tenda përmes tre anijeve të nisura vetëm muajin e kaluar.
Dërgesa e fundit përfshin ushqime, artikuj për kujdesin personal, mjete mjekësore dhe materiale për strehim. Pehlivan theksoi se Turqia ka vazhduar ndihmat humanitare edhe për Gazën, ku anija e 20-të e ndihmave pritet të niset javën e ardhshme, duke sjellë deri tani gjithsej rreth 105,000 tonë ndihma.
Sudani është përfshirë nga konflikti i dhunshëm midis ushtrisë dhe Forcave të Shpejta të Mbështetjes (RSF) që nga prilli i vitit 2023, duke shkaktuar mijëra viktima dhe miliona të zhvendosur. Aktualisht RSF kontrollon pothuajse të gjithë pesë shtetet e Darfurit, ndërsa ushtria ka mbetur dominues në shumicën e 13 shteteve të tjera, përfshirë kryeqytetin Khartoum. /mesazhi
