Shoqëria ndërkombëtare reagon ndaj ngrirjes për vdekje të 19 emigrantëve të parregullt të shtyrë nga Greqia.
Liz Throssell, zëdhënëse e Komisionerit të Lartë të Kombeve të Bashkuara për të Drejtat e Njeriut (OHCHR), tha: “Raportet e vdekjeve të emigrantëve janë vërtet shqetësuese dhe duhet të hetohen urgjentisht nga autoritetet përkatëse. Ne nuk kemi asnjë informacion të drejtpërdrejtë për atë që ndodhi këtu. Megjithatë, siç e dini, Zyra e OKB-së për të Drejtat e Njeriut ka theksuar vazhdimisht se shtetet kanë të drejtë të ushtrojnë juridiksionin e tyre në kufijtë e tyre ndërkombëtarë, por ata duhet ta bëjnë këtë në dritën e detyrimeve të tyre për të drejtat e njeriut”.
Shabia Mantoo, zëdhënëse e Komisionerit të Lartë të OKB-së për Refugjatët (UNHCR), e quajti vdekjen e emigrantëve të parregullt në fjalë si “zemërthyese”.
Mantoo tha se ata po ndjekin nga afër ngjarjen e jetuar me të gjitha palët e përfshira në incidentin në Greqi.
“Ne po bëjmë thirrje për një hetim urgjent. Përsërisim thirrjen tonë për të siguruar që jetët, të drejtat, siguria dhe mirëqenia e refugjatëve dhe emigrantëve të mbrohen dhe të vihen në radhë të parë,” tha ajo.
Safa Msehli, zëdhënëse e Organizatës Ndërkombëtare të OKB-së për Migracionin (IOM), tha se ata ishin të tmerruar.
Ministria e Jashtme gjermane tha në një deklaratë se njoftimet për vdekjet në kufirin greko-turk u vërejtën me shqetësim nga qeveria gjermane.
Është e rëndësishme që të zbardhen detajet e ngjarjes”, bëhet e ditur në deklaratë.
“Në parim, është e një rëndësie qendrore që të gjitha mbrojtjet kufitare të përmbushin standardet humanitare në të gjitha rrethanat dhe të jenë në përputhje me dispozitat e zbatueshme të ligjit ndërkombëtar dhe evropian”, theksohet në deklaratën e Ministrisë së Jashtme gjermane.
Anitta Hipper, një zëdhënëse e Komisionit të BE-së, tha në një konferencë të përditshme për shtyp se ata shprehin keqardhje të thellë për humbjen e jetëve të emigrantëve të parregullt.
“Trajtime të tilla nuk mund të tolerohen nëse konfirmohen,” tha Hipper, duke shtuar se Komisionerja e BE-së për Punët e Brendshme Ylva Johansson është në kontakt të ngushtë me homologun e saj grek.
Johansson kishte thënë më parë se vdekjet nga ngrirja e 19 emigrantëve të parregullt në kufirin turko-grek duhet të hetohen.
Kujtojmë se trupat e 11 emigrantëve të parregullt që ngrinë për vdekje të mërkurën u gjetën në zonën rurale Mandakoru në afërsi të fshatit Pasakoy të Edrenesë.
Një emigrant i parregullt, i cili u dërgua në spital nuk mundi të shpëtohej pavarësisht ndërhyrjes së mjekëve.
Ministri i Brendshëm, Suleyman Soylu, tha se këpucët dhe rrobat e emigrantëve të ngrirë deri në vdekje ishin hequr dhe shtyrë nga trupat kufitare greke.
Ekuipazhet gjetën edhe trupat e shtatë emigrantëve të tjerë, të cilët u ngrinë për vdekje në të njëjtën zonë të enjten. /trt
