Mbretëria e Bashkuar do të ndalojë pirjen e duhanit për të gjithë personat e lindur pas vitit 2008, pasi Dhoma e Komunave dhe Dhoma e Lordëve ranë dakord për draftin përfundimtar të një legjislacioni historik, transmeton Anadolu.
Fëmijët e moshës 17 vjeç ose më të rinj do të përballen me një ndalim të përjetshëm për të blerë cigare, pasi Projektligji për Duhanin dhe Cigaret me Avull kaloi në Parlament, raportoi të martën BBC.
Të dyja dhomat kanë miratuar tekstin përfundimtar të ligjit, i cili synon të ndalojë këdo që ka lindur pas 1 janarit 2009 të fillojë ndonjëherë pirjen e duhanit, duke e bërë të paligjshme për dyqanet t’u shesin produkte duhani, duke krijuar në mënyrë efektive një brez pa duhan.
Ministrat do të fitojnë gjithashtu kompetenca të reja për të rregulluar produktet e duhanit, cigareve me avull dhe nikotinës, përfshirë kufizime mbi aromat dhe paketimin pasi ligji të marrë miratimin mbretëror.
Sipas legjislacionit, përdorimi i cigareve me avull (vape) do të ndalohet në makina ku ndodhen fëmijë, si dhe në kënde lojërash, jashtë shkollave dhe rreth spitaleve, duke zgjeruar rregullat për zonat ku ndalohet pirja. Cigaret me avull do të vazhdojnë të lejohen jashtë spitaleve për të mbështetur ndërprerjen e pirjes së duhanit.
Sekretari i Shëndetësisë, Wes Streeting, e quajti reformën një moment të madh në shëndetin publik, duke thënë: “Parandalimi është më i mirë se kurimi – kjo reformë do të shpëtojë jetë, do të lehtësojë presionin mbi Shërbimin Kombëtar Shëndetësor dhe do të ndërtojë një Britani më të shëndetshme”.
Baronesha Merron, zëvendëssekretare parlamentare në Departamentin e Shëndetësisë dhe Kujdesit Social, e përshkroi atë si ndërhyrjen më të madhe në shëndetin publik në një brez, duke shtuar se do të shpëtojë jetë.
Ish-deputeti konservator Lord Naseby tha se projektligji “shqetëson shumë njerëz në atë industri”, përfshirë shitësit me pakicë, dhe pohoi se duhet vendosur më shumë theks te edukimi për të parandaluar fillimin e pirjes së duhanit.
Legjislacioni u prezantua më 5 nëntor 2024 me qëllimin për të krijuar brezin e parë pa duhan në Mbretërinë e Bashkuar.
Sipas Departamentit të Shëndetësisë, pirja e duhanit shkakton rreth 80.000 vdekje çdo vit në Mbretërinë e Bashkuar, përbën një në katër vdekje nga kanceri në Angli dhe vret deri në dy të tretat e përdoruesve afatgjatë.
