Duke mirëpritur edhe një Ramazan në tendat e zhvendosjes, fëmijët palestinezë në Rripin e Gazës kanë krijuar dekorime të punuara me dorë për të forcuar shpresën e tyre pavarësisht shkatërrimit të madh të lënë nga sulmet izraelite, transmeton Anadolu.
Fëmijët që përpiqen të mbijetojnë në tenda u mblodhën së bashku për të krijuar fenerë dhe zbukurime duke përdorur çfarëdo materialesh që mund të gjenin, duke u përpjekur të ringjallin atmosferën shpirtërore të muajit të shenjtë mes rrënojave dhe vështirësive.
Teksa palestinezët përgatiten të vëzhgojnë Ramazanin e tyre të parë që nga armëpushimi, vullnetarët po organizojnë aktivitete të përqendruara veçanërisht në ngritjen e moralit të fëmijëve.
Abdurrahman Abu Cehl, një nga vullnetarët, tha se nisma u mundëson fëmijëve të shprehin emocionet e tyre përmes pikturës dhe punimeve artizanale.
“Ne përpiqemi t’u rikthejmë buzëqeshjet dhe ndjenjën e gëzimit fëmijëve që kanë nevojë të dëshpëruar për lehtësim emocional pasi kanë humbur kaq shumë. Po bëjmë më të mirën për t’u ofruar atyre qoftë edhe një pamje të vogël të një jete dinjitoze”, tha Abu Cehl.
Për shumë familje, dekorimet modeste simbolizojnë qëndrueshmërinë dhe vendosmërinë për të ruajtur frymën e Ramazanit pavarësisht mungesave të vazhdueshme edhe të nevojave më themelore.
Pavarësisht armëpushimit, Izraeli nuk lejon hyrjen e ndihmave të mjaftueshme në Gaza dhe vazhdon t’i privojë palestinezët nga nevojat më bazike humanitare.
Armëpushimi midis Izraelit dhe Hamasit u arrit më 10 tetor, bazuar në një plan paqeje me 20 pika të propozuar nga presidenti amerikan, Donald Trump.
Sipas Ministrisë së Shëndetësisë në Gaza, ushtria izraelite ka vazhduar ta shkelë armëpushimin, vetëm që atëherë duke vrarë 576 palestinezë dhe duke plagosur 1.543 të tjerë.
