Sulmuesi më i shtrenjtë i historisë së futbollit, Neymar, u operua sot në këmbën e djathtë në “Belo Horizonte” dhe gjithçka kaloi shumë mirë, njoftoi Federata Braziliane e Futbollit (CBF).
“Operacioni përfundoi, Neymar ndodhet në dhomën e tij dhe po shlodhet. Gjithçka kaloi shumë mirë”, njoftoi një atashe i CBF-së pasi doli nga spitali.
Këmba më e shtrenjtë e botës së futbollit u operua nga kirurgu Rodrigo Lasmar, mjeku i ekipit brazilian të futbollit, i shoqëruar nga francezi Gerard Saillant, i famshëm që ka operuar gjurin e ish-sulmuesit Ronaldo.
Sipas familjarëve të pacientëve në spital, operacioni u zhvillua në katin e 16-të të godinës, ku një pavion i tërë u prenotua për Neymar-in.
Në mënyrë që të mos dalë asnjë informacion, personeli i spitalit mori një mesazh ku i ndalohej përdorimi i telefonave celularë pranë lojtarit.
